वीरगंज (पर्सा), ३० पुस / वीरगंज महानगरपालिकाका उप–प्रमुख इम्तियाज आलमले मुलुकको विकासका लागि युवा उद्यमशीलताको आवश्यकता रहेको बताएका छन् ।
वीरगंजका छात्रछात्राहरुको लागि इन्प्रोभिङ्ग वीरगंजद्वारा आयोजित ‘रन अफ च्यारिटि’ दौड प्रतियोगिताको शुभारम्भ गर्दै वीरगंज महानगरपालिकाका उप–प्रमुख इम्तियाज आलमले छात्रछात्राहरुलाई सृर्जनशील तथा उद्यमशील बनाउन सरकारले लगानी बढाउनुपर्ने कुरामा जोड दिए । साथै महानगरबाट छात्रछात्राहरुको लागि लक्षित कार्यक्रम समेत ल्याउने प्रतिबद्धता जनाए ।
युवा वर्गको समग्र हित र अधिकारको विषयलाई व्यवस्थित गर्नुपर्ने भन्दै उपप्रमुख आलमले छात्रछात्राहरुको क्षमताको उजागर गरि दिगो विकास लक्ष्य हासिल गर्न सकिने बताए । उनले देश विकासको अभियानमा छात्रछात्राहरुलाई पहिला देखि नै सीप तथा क्षमता उपयोग गर्नुपर्ने बताए ।
उप–प्रमुख आलमको प्रमुख आतिथ्यता आयोजित कार्यक्रममा वडा प्रहरी कार्यालय वीर्ताका प्रहरी निरीक्षक विशाल मल्ल, कार्यपालिका सदस्य कनिका कौसिक, युवा नेता दिलिप कार्की लगायत स्थानीय युवाहरूको सहभागिता रहेको थियो ।
प्रतिक्रिया दिनुहोस् !