वीरगंज (पर्सा), ४ मंसिर । सरकारले वीरगंज महानगरपालिकाका प्रमुख प्रशासकीय अधिकृत वसन्तबहादुर बोहराको सरुवा गरेको छ । शुक्रबार बसेको मन्त्रिपरिषद् बैठकले बोहरासहित सहसचिव वा सोसरहका ३२ जना कर्मचारीको सरुवा गर्ने निर्णय गरेको हो ।
सरकारको निर्णयअनुसार बोहरालाई संघीय मामिला तथा सामान्य प्रशासन मन्त्रालयमा सरुवा गरिएको छ भने उनको स्थानमा अर्थ मन्त्रालयमा कार्यरत सहसचिव निर्मल ढकाललाई वीरगञ्ज महानगरपालिकाको प्रमुख प्रशासकीय अधिकृतको जिम्मेवारी दिइएको छ ।
बोहरालाई गत जेठ ११ गते भूमि व्यवस्था, सहकारी तथा गरिबी निवारण मन्त्रालयबाट सरुवा गरी वीरगंजमहानगरपालिकाको प्रमुख प्रशासकीय अधिकृतका रूपमा पठाइएको थियो । महानगरपालिकामा जिम्मेवारी सम्हालेको केही महिनामै उनको सरुवा भएको हो । मन्त्रिपरिषद्को निर्णयबाट आठ जना प्रदेश सचिवसहित ३२ जना सहसचिवको जिम्मेवारी हेरफेर गरिएको छ ।
यसैगरी, हेटौँडा उपमहानगरपालिकाका प्रमुख प्रशासकीय अधिकृत टेकबहादुर वलीलाई अर्थ मन्त्रालयमा सरुवा गरिएको छ । उनको स्थानमा सूचना तथा सञ्चार मन्त्रालयमा कार्यरत सहसचिव रविलाल शर्मालाई पठाउने निर्णय भएको छ । सरकारको पछिल्लो प्रशासनिक फेरबदलसँगै वीरगंज महानगरपालिकाको प्रशासनिक नेतृत्वमा पनि परिवर्तन हुने भएको छ ।

























प्रतिक्रिया दिनुहोस् !