वीरगंज (पर्सा), २९ असोज / वीरगंजको ड्राईपोर्ट चोकमा एकैदिन छुट्टाछुट्टै सवारी दुर्घटना हुँदा दुई जनाको मत्यु भएको छ । वीरगंज महानगरपालिकाको वडा न.२४ बहुअरी चोक स्थित ड्राईपोर्टमा सवारी दुर्घटना हुँदा पौदल यात्रुको मृत्यु भएको हो ।
शुक्रबार विहान १० बजे भएको सवारी दुर्घटनामा पोखरिया नगरपालिकाको वडा नं. १ वनकटवा निवासी ६० बर्षिय विगा रामको मृत्यु भएको प्रहरीले जनाएको छ । ड्राईपोर्टबाट परवानिपुर तर्फ जाँदै गरेको ना ३ ख ५७४३ नम्बरको खाली लहरीले बाटो काट्दै गरेको पैदल यात्री रामलाई ठक्कर दिँदा उनी गम्भिर घाइते भएका थिए । दुर्घटना बारे थाहा पाए लगतै प्रहरी चौकी सिर्सियाबाट खटिएको टोलीले घाईते रामलाई तत्कालै उपचारको लागि नारायणी अस्पताल वीरगंजमा पठाइएकोमा चिकित्सकले उनलाई मृत घोषणा गरेको जिल्ला प्रहरी कार्यालय पर्साले जनाएको छ ।
ठक्दर दिने लहरी र चालक वीरगंज महानगरपालिका वडा नं.१९ बिन्दवासिनी निवासी २४ बर्षिय सुजित यादवलाई नियन्त्रणमा लिएर मृतकको शव जाँच प्रकृति मुचुल्का लगायतको अनुसन्धान कार्य भइरहेको जिल्ला प्रहरी कार्यालय पर्साका प्रवक्ता प्रहरी नायब उपरिक्षक दिपक गिरीले जानकारी दिए ।
त्यसैगरी त्यसको केहीँ घण्टा नवित्दै पुनः ड्राईपोर्टमा अर्को सवारी दुर्घटना हुँदा थप एक जनाको मृत्यु भएको प्रहरीले जनाएको छ । वीरगंज महानगरपालिकाको वडा नं.२५ स्थित ड्राईपोर्टमा मोटरसाइकललाई ट्रकले ठक्कर दिदाँ मोटसाइकल चालकको मृत्यु भएको हो ।
ट्रकले मोटरसाइकललाई ठक्कर दिदाँ वीरगंज महानगरपालिकाको वडा नं. २३ सवैठवा निवासी ३० बर्षिय सन्तोष कुशवाहाको मृत्यु भएको प्रहरीले जनाएको छ । शुक्रबार दिउसो २ः२५ बजेको समयमा ड्राईपोर्ट गेट अगाडी उत्तरबाट दक्षिण दिशातर्फ गईरहेको प्रदेश २–०३–०२० प ८७९९ नम्वरको पल्सर मोटरसाईकललाई सोही दिशा तर्फ गईरहेको ना.५ ख २२६१ नम्बरको ट्रकले पछाडिबाट ठक्कर दिदा मोटरसाइकल चालक कुशवाहा गम्भिर घाईते भएका थिए ।
दुर्घटना पश्चात तत्कालै प्रहरी चौकी सिर्सियाबाट खटिएको प्रहरी टोलीले घाईते भएका भारत जिल्ला आदापुर घर भई हाल जिल्ला पर्सा वीरगंज महानगरपालिकाको वडा नं. २३ सवैठवा निवासी कुशवाहालाई तत्कालै उपचारको लागि नारायणी अस्पताल वीरगंजमा पठाएको थियो । गम्भीर घाईते कुशवाहाको अस्पताल पु¥याउँदा चिकित्सकले मृत्यु भएको जानकारी गराएको जिल्ला प्रहरी कार्यालय पर्साले जनाएको छ ।
ठक्कर दिने ट्रक र चालक वीरगंज महानगरपालिका कै वडा नं. २४ रामगढवा निवासी ४० बर्षिय ओमबाबु कुर्मीलाई नियन्त्रणमा लिएर आवश्यक अनुसन्धान प्रक्रिया अगाडि बढाइएको जिल्ला प्रहरी कार्यालय पर्साका प्रहरी नायब उपरीक्षक गिरीले जानकारी दिए ।
प्रतिक्रिया दिनुहोस् !