वीरगंज (पर्सा), २६ असोज / वीरगंज स्थित स्पर्श मल्टि स्पेसलिटि अस्पतालले सशस्त्र प्रहरी बल नेपालमा बहालवाला सशस्त्र प्रहरी कर्मचारीहरु तथा पूर्व सशस्त्र प्रहरी कर्मचारीहरु र तिनीहरुको परिवारका सदस्यलाई स्वास्थ्य उपचार सेवाको सेवा शूल्क छुट सुविधा उपलब्ध गराउने भएको छ ।
सशस्त्र प्रहरी बल, नेपाल नम्बर १२ गण हेडक्वाटर बाराको समन्वयमा सशस्त्र प्रहरी बल नेपाल नेपाल नम्बर २ छिन्नमस्ता बाहिनी मुख्यालय महोत्तरी र स्पर्श मल्टीस्पेस्यालिटी अस्पतालबीच छुट उपलब्ध गराउने सम्बन्धमा सोमबार सम्झौता भएको छ ।
दुईपक्षिय सम्झौताका अनुसार ओपिडी सेवामा २० प्रतिशत, साधारण प्याथोलोजी जाँच, ल्यावको स्पेशल टेष्टहरुमा, रेडियोलोजी जाँचहरु र साधारण बेड चार्जमा लाग्ने दस्तुरमा २५ प्रतिशत, आईसियू, एनआईसीयू र एसी वार्डको बेड चार्जमा २५ प्रतिशत, एमआरआई र सिटि स्क्यानमा १५ प्रतिशत, ओटी सेवामा चिकित्सक पारिश्रमिक बाहेक १५ प्रतिशत लगायतको सेवामा अस्पतालले छुट उपलब्ध गराउने छ ।
यसका साथै विशेष परिस्थितिमा उल्लेखित सेवाग्राहीहरुको पारिवारिक आर्थिक अवस्था नाजुक रहेको पाईएमा दुबै पक्षको आपसी सहमतिमा छुट सुविधा बाहेक अन्य थप सुविधा समेत उपलब्ध गराउन सकिने अस्पतालका सञ्चालक डा. महेश्वर प्रसाद कुर्मीले जानकारी दिए । छुट सुविधा प्राप्तिको लागि उपचार अवधि भित्रमा बहालवाला सशस्त्र प्रहरी कर्मचारीहरूले सशस्त प्रहरी बल, नेपालबाट जारी भएको परिचय पत्र पेश गर्नुपर्नेछ ।
सम्झौता पत्रमा सशस्त्र प्रहरी बल नेपालको तर्फबाट सशस्त्र प्रहरी बल नेपाल नेपाल नम्बर २ छिन्नमस्ता बाहिनीका सशस्त्र प्रहरी नयाब महानिरिक्षक गणेश बहादुर ठाडा मगर र स्पर्श अस्पतालको तर्फबाट अस्पतालका डा. महेश्वर प्रसाद कुर्मीले हस्ताक्षर गरेका छन् ।
प्रतिक्रिया दिनुहोस् !