सिमरा (बारा), २ असोज / दोस्रो अन्तर्राष्ट्रिय सिमरा भेट्रान कप फूटवल प्रतियोगिताको उपाधी मोरङ्ग भेट्रान क्लबले जितेको छ । सिमरा रंगशालामा शनिवार भएको फाईनल खेलमा चितवनलाई २–० लाई पराजित गर्दै मोरङ्गले उपाधी जितेको हो ।
मोरङ्गका लागि डेनिम राई र विनोद धिमालले समान एक एक गोल गरेका थिए । मोरङ्गले खेलको १३ औं र ३३ औ मिनेटमा गोल गरेको हो । उपाधी विजेता मोरङ्गले एक लाख ५० हजार र उपविजेता चिवनले ७५ हजार प्राप्त गरेको छ । प्रतियोगिताको सर्वोत्कृष्ट खेलाडी मोरङ्गका डेनिम राई, उत्कृष्ट गोलरक्षक मोरङ्गका मिनबहादुर बस्नेत, उत्कृष्ट रक्षक मोरङ्गका रमेशकुमार बस्नेत घोषित भएका छन् ।
यसैगरी उत्कृष्ट मिडफिल्ड चितवनका यमु राना घोषित हुँदा सर्वाधिक गोलकर्ताको उपाधी सिमरा भेट्रानका गोपिप्रसाद भट्टले प्राप्त गरेका छन् । सिमराका युवा समाजसेवी श्यामबाबु गुप्ता, ईलाका प्रहरी कार्यालय सिमराका प्रहरी नायब उपरिक्षक युवराज तिमिल्सिना, सिमरा भेट्रान क्लबका राजकपुर राउत, नेपाल पत्रकार महासंघ बाराका अध्यक्ष रेशम तिवारी, नेकपा एमाले जीतपुर सिमरा २ का वडा कमिटी अध्यक्ष रविन्द्र खकुरेललगायतले पुरस्कार वितरण गरेका थिए ।
स्वर्गीय मञ्जुदेवी गुप्ताको स्मृतिमा सिमरा भेट्रान क्लबले भदौ २९ गतेदेखि प्रतियोगिताको आयोजना गरेको हो । प्रतियोगितामा भारतका दुई सहित १६ टिमको सहभागिता रहेको थियो । यसअघि फाईलनको खेलको उद्घाटन प्रमुख अतिथि गुप्ताले गरेका थिए । खेलको उद्घाटन गर्दै गुप्ताले भेट्रान फूटवललाई व्यवसायिक बनाउनुपर्ने बताए ।
सिमरा भेट्रानका अध्यक्ष राउतको अध्यक्षतामा सम्पन्न समापन समारोहमा प्रतियोगिता संयोजक हरी चौधरीले स्वागत मन्तब्य राखेका थिए । कार्यक्रमको सहजीकरण संचार संयोजक प्रदीप गौतमले गरेका थिए ।
प्रतिक्रिया दिनुहोस् !