वीरगन्ज (पर्सा), १४ जेठ / पर्साको पकहा मैनपुर गाउँ कार्यपालिका सदस्यमा ४ जना महिला सदस्य निर्विरोध निर्वाचित भएका छन् । गाउँ कार्यपालिको ४ महिला सदस्यको लागि नेपाली कांग्रेसबाट ४ जनाको मात्र मनोनय दर्ता भएपछि निर्विरोध निर्वाचित भएको निर्वाचन अधिकृत कृष्ण प्रसाद देवकोटाले जानकारी दिए ।
कांग्रेसकी लालपरी देवी, रमाउती देवी तेलीन, राधिका देवी हरिजन र सुनिता देवी चौहान निर्विरोध निर्वाचित भएको निर्वाचन अधिकृतको कार्यालय पकहा मैनपुरले जनाएको छ । दुई दलित वा अल्पसंख्यक सदस्यको लागि ३ जनाको मनोनयन दर्ता भएका कारण निर्वाचन तालिका अनुसार जेठ १६ गते सोमबार निर्वाचन हुने निर्वाचन अधिकृत देवकोटाले जानकारी गराए । गाउँ कार्यापालिका दलित वा अल्पसंख्यक सदस्यको लागि कांग्रेसबाट रामबहादुर साह सोनार, नेकमहमद मियाँ दर्जी र स्वतन्त्रबाट अकलेश कुमार साहको मनोनयन दर्ता भएको छ । दुई दलित वा अल्पसंख्यक सदस्यको लागि शुक्रबार ७ जनाले उम्मेदवार दर्ता गराए पनि शनिबार ४ जनाले फिर्ता लिएको निर्वाचन कार्यालयले जनाएको छ ।
निर्वाचन कार्यालयका अनुसार स्वतन्त्रबाट मनोनय दर्ता गराएका रामायण दास, प्रतिज्ञा देवी, दिपनारायण ठाकुर र मृत्युन्जय कुमार श्रीवास्तवले आफ्नो मनोनयन दर्ता फिर्ता लिएका हुन् । स्वतन्त्रबाट नै मनोनय दर्ता गराएका अकलेश आफ्नो मनोनयन दर्ता कायम राखेका कारण निर्वाचन हुने भएको हो । अकलेशले स्वतन्त्रबाट मनोनय दर्ता गराए पनि उनी नेकपा एमालेका गाउँपालिका कमिटी अध्यक्ष हुन् । ५ वटा वडा रहेको पकहा मैनपुर गाउँपालिकामा दुई वडा सदस्य वाहेक सम्पूर्ण पदमा नेपाली कांग्रेसका उम्मेदवार विजयी भएका छन् । त्यस कारण निर्वाचन भएपनि कांग्रेस कै उम्मेदवार विजयी हुने निश्चित जस्तो रहेको छ ।
प्रतिक्रिया दिनुहोस् !