इन्धनमा मुल्य वृद्धि फिर्ताको माग गर्दै वीरगन्जमा विरोध प्रदर्शन

वीरगन्ज (पर्सा), ९ जेठ / इन्धनमा गरिएको मुल्य वृद्धिको विरोध गर्दै सत्तारुढ दल नेपाली काँग्रेसकै भातृसंगठन नेपाल विधार्थी संघ (नेविसंघ) ले वीरगन्जमा विरोध प्रदर्शन गरेको छ ।
इन्धनमा गरिएको मुल्यवृद्धि फिर्ताको माग गर्दै नेविसंघले वीरगन्जमा सोमबार दिउँसो प्रदर्शन गरेको हो ।
घण्टाघर चोकमा गरिएको प्रदर्शनमा सहभागीहरुले मुल्य वृद्धि फिर्ता गर, आपुर्तिमन्त्रालय होशीयार, असक्षम आयल निगम मुर्दावाद, जनता मार्न पाइदैन, मुल्यवृद्धि चाँहिदैन जस्ता सहित विरोध प्रदर्शन गरेका थिए । नेविसंघका ठाकुरराम बहुमुखी क्याम्पस इकाइ अध्यक्ष मनोज कुमार साहको नेतृत्वमा गरिएको विरोध प्रदर्शनमा सहभागीहरुले मुल्यवृद्धि गर्ने नेपाल आयल निगम र सरकारका विरुद्ध पनि नाराबाजी गरेका थिए ।
विरोध प्रदर्शनलाई सम्बोधन गर्दै नेविसंघका इकाइ अध्यक्ष साहले दैनिक उपभोग्य वस्तुमा भइरहेको मुल्यवृद्धिले पीडित नागरिकलाई इन्धनमा पनि पटक पटक गरिएको मुल्यवृद्धिले झन आहत पारेको बताए । आयल निगम र सरकारको यो निर्णय जनविरोधी रहेको भन्दै इन्धनमा गरिएको मुल्यवृद्धि फिर्ता नगरिए अझ सशक्त आन्दोलनमा उत्रिने चेतावनी समेत दिए ।
आयल निगमले आइतबार राति १२ बजेदेखि लागु हुने गरि पेट्रोल, डिजेल र मट्टितेल प्रतिलिटर १० रुपैयाँका दरले बढाएको छ । अब पेट्रोलको मूल्य प्रतिलिटर रु. १८० तथा डिजेल र मट्टितेलको मूल्य १६३ रुपैयाँ पर्ने भएको छ । त्यस्तै खाना पकाउने ग्यासको मूल्य प्रतिसिलिण्डर २ सय रुपैयाँ बढेको छ । अब ग्यासको भाउ प्रतिसिलिण्डर १८ सय रुपैया पुगेको छ ।