वीमनपा वडा नं. १० को वडाध्यक्षमा सुशिल निर्वाचित

वीरगन्ज (पर्सा), ८ जेठ / जसपाका युवा नेता सुशिल कुमार कानु वडाध्यक्षमा निर्वाचित भएका छन् । वीरगन्ज महानगरपालिका वडा नम्बर १० को वडा अध्यक्षमा सुशिल निर्वाचित भएका हुन् । वीरगन्ज महानगरपालिका वडा नम्बर १० का निवर्तमान वडाअध्यक्ष रामनगीना प्रसाद कानुलाई ४७३ मतको अन्तरले पराजित गर्दै सुशील वडाध्यक्षमा निर्वाचित भएका हुन् ।
सुशिलले १५९६ मत पाउदा उनका निकटतम प्रतिस्पर्धी काँग्रेसका उम्मेदवार रामनगीनाले भने ११२३ मत मात्रै पाएका छन् । नेकपा एमालेका उम्मेदवार अजय साह कानुले भने ८१९ र स्वतन्त्र उम्मेदवार जय प्रकाश खेतानले २३० मत पाएका छन् ।
वडाअध्यक्षमा निर्वाचित सुशिल, महानगरपालिकाको निवर्तमान कार्यपालिका सदस्य पनि हुन् । २०७४ को निर्वाचनमा भने सुशील, रामनगीनासंगै १२० मतको अन्तरले वडाअध्यक्षमा पराजित भएका थिए । त्यसबेला सुशीलले १२१९ मत पाएका थिए भने रामनगीनाले १३३९ मत पाएका थिए ।
त्यसलगत्तै भएको कार्यपालिका सदस्यको निर्वाचनमा भने तत्कालीन संघीय समाजवादी फोरम र हालको जसपाबाट उम्मेदवार बनेर उनि कार्यपालिका सदस्यमा निर्वाचित भएका थिए ।