कालिकामाईको अध्यक्षमा जसपा र उपाध्यक्षमा कांग्रेसका उम्मेदवार विजयी

वीरगन्ज (पर्सा), ४ जेठ / पर्साको कालिकामाई गाउँपालिका अध्यक्षमा जनता समाजवादी पार्टी (जसपा) नेपाल र उपाध्यक्षमा नेपाली कांग्रेसका उम्मेदवार विजयी भएका छन् । गाउँपालिका अध्यक्षमा जसपाका बशिष्ट गुप्ता ३ हजार ७४३ मत प्राप्त गरी विजयी भएको निर्वाचन अधिकृतको कार्यालय कालिकामाईले जनाएको छ । उनको निकटतम प्रतिस्पर्धी कांग्रेसका अजय पटेलले ३ हजार ६२६ मत प्राप्त गरेका छन् । २१ बर्षिय बशिष्ट ११७ मतान्तरले विजयी भएका हुन् । भारतको देहरादुनबाट बिबिए अध्ययन गरेका बशिष्ट एक बर्षदेखी घर मै बसेका थिए । बशिष्ट जसपाका गाउँपालिका अध्यक्ष दिनेश प्रसाद कलवारका भतिजो हुन् ।
गाउँपालिका अध्यक्षका अर्का उम्मेदवार नेकपा एमालेका निर्वतमान कार्यवाहक अध्यक्ष एवम् उपाध्यक्ष रजेश चौरसिया १ हजार ३१७ मत, नेपाल सुशासन पार्टीका बलराम तिवारी (दिपु) ९५९ मत, लोकतान्त्रिक समाजवादी पार्टी (लोसपा) नेपालका प्रभुलाल प्रसाद चौरसिया १३८ मत र नेकपा माओवादी केन्द्रका महिन्द्र राउत कुर्मी ३९ मत पाएका छन् । मतगणना सुरु भएदेखी नै कांग्रेसका अजय अग्रता कायम राखे पनि वडा नं. ५ बिरन्चिबर्वामा गएर जसपाका बशिष्टबाट पछाडी परेका थिए । एउँटै गाउँ मुडलीका रहेका बशिष्ट र अजय बिच सुरुदेखी अन्त सम्म कडा प्रतिस्पर्धा देखिएको थियो । उपाध्यक्षमा कांग्रेसकी राजमती ३ हजार ९३३ मत ल्याएर विजयी भएका छन् । उनको निकटतम् प्रतिस्पर्धी जसपाकी सहानी खातुन ३ हजार ७५४ मत प्राप्त गरेका छन् । राजमती सुरुदेखी अन्तिम सम्म अग्र स्थानमा रहँदै विजयी भएका हुन् ।
उपाध्यक्षका अर्का उम्मेदवार नेकपा एमालेका श्रीमती अंशु आनन्दले ११४६ मत, सुशासन पार्टीकी नितु कुमारी ५७३ मत र लोसपाका अनिला देवीले १२१ मत पाएका छन् । अध्यक्षमा निर्वाचित दल जसपाले उपाध्यक्षमा निर्वाचित राजमतीलाई टिकट नदिएपछि उनी कांग्रेस प्रबेश गरी टिकट लिन सफल भएकी थिइन । ५ वटा वडा रहेको गाउँपालिकाको ३ वटा वडाध्यक्षमा जसपा, एक÷एक वटामा एमाले र कांग्रेस विजयी भएको छ । वडा नं. १ मा जसपाका लालबाबु चौरसिया, वडा नं. २ मा पुनः एमालेका सोनालाल चौरसिया, वडा नं. ३ मा पुनः जसपाका संजय पटेल, वडा नं. ४ मा कांग्रेसका संजय साह र वडा नं. ५ मा जसपा कै जयनारायण पटेल विजयी भएका छन् ।