काठमाडौँ, २७ असोज । भारतबाट वीरगंज नाका हुँदै काठमाडौं उपत्यकामा खैरो हेरोइन (ब्राउन सुगर) आपूर्ति गर्ने आरोपमा प्रहरीले वीरगंजका एक जनालाई पक्राउ गरेको छ । लागूऔषध नियन्त्रण ब्यूरोबाट खटिएको प्रहरी टोलीले काठमाडौंको तार्केश्वर नगरपालिका–४ बाट ३०० ग्राम खैरो हेरोइनसहित पर्साको वीरगंज महानगरपालिका–३१ का ४१ वर्षीय बसरुदिन मियाँलाई नियन्त्रणमा लिएको हो ।
लागूऔषध नियन्त्रण ब्यूरो कोटेश्वरका अनुसार भारतबाट वीरगंज नाका हुँदै काठमाडौं उपत्यकामा लागूऔषध भित्र्याउने गिरोहको पहिचान र निगरानी गर्ने क्रममा मंगलबार मियाँ शंकास्पद अवस्थामा फेला परेका थिए । प्रहरीले उनलाई रोक्न र जाँच गर्न खोज्दा प्रहरीमाथि आक्रमण गरी भाग्ने प्रयास गरेको ब्यूरोले जनाएको छ । त्यसपछि उनलाई नियन्त्रणमा लिन प्रहरीले चेतावनीस्वरूप दुई राउन्ड हवाई फायर गरेको थियो।
सोही क्रममा मियाँलाई पक्राउ गरिएको प्रहरीले जनाएको छ । पक्राउ परेका मियाँको साथबाट ३०० ग्राम खैरो हेरोइन र एउटा मोबाइल फोन बरामद भएको छ ।
तीन महिनामा पाँचदेखि छ पटकसम्म आपूर्ति
ब्यूरोका अनुसार प्रारम्भिक अनुसन्धानका क्रममा मियाँले पछिल्लो तीन महिनामा पाँचदेखि छ पटकसम्म काठमाडौं उपत्यकामा खैरो हेरोइन आपूर्ति गरेको खुलेको छ । प्रत्येक पटक करिब २०० ग्रामका दरले लागूऔषध ल्याउने गरेको प्रारम्भिक अनुसन्धानबाट देखिएको ब्यूरोले जनाएको छ ।
भारतबाट वीरगंज नाका हुँदै काठमाडौंसम्म लागूऔषध आपूर्ति हुने सञ्जालमाथि निगरानी गर्ने क्रममा मियाँ पक्राउ परेका हुन् । घटनाबारे थप अनुसन्धान भइरहेको प्रहरीले जनाएको छ । 
प्रतिक्रिया दिनुहोस् !