कलैया (बारा), २७ असोज । बारामा भारतबाट भन्सार छली गरी नेपाल भित्र्याइँदै गरेका ११ लाख ४६ हजार रुपैयाँ बराबरका कपडा र तीनवटा मोटरसाइकल सशस्त्र प्रहरीले बरामद गरेको छ । घटनामा संलग्न रहेको आशंकामा प्रहरीले एक जनालाई नियन्त्रणमा लिएको छ । मंगलबार सुवर्ण गाउँपालिका–३ स्थित पचगछिया क्षेत्रको सीमावर्ती इलाकामा खटिएको सशस्त्र प्रहरीको गस्ती टोलीले अवैध रूपमा भन्सार छली गरी ल्याइँदै गरेका सामान नियन्त्रणमा लिएको हो ।
सशस्त्र प्रहरी बल नेपाल नम्बर १२ गण हेडक्वार्टर बाराका सूचना अधिकारी तथा सशस्त्र प्रहरी नायब उपरीक्षक विक्रममणि अधिकारीका अनुसार बरामद सामानमध्ये ६ लाख ९६ हजार रुपैयाँ मूल्यका साडी तथा धोती र ४ लाख ५० हजार रुपैयाँ मूल्यका तीनवटा मोटरसाइकल छन् । सीमा सुरक्षा गुल्म पिपरपाती र बोर्डर आउट पोस्ट (बीओपी) बेनौलीबाट खटिएको संयुक्त गस्ती टोलीलाई देखेपछि मोटरसाइकलमा सामान बोकेर ल्याउँदै गरेका केही व्यक्ति सामग्री छाडेर फरार भएका थिए ।
सोही क्रममा प्रहरीले एक जनालाई नियन्त्रणमा लिन सफल भएको अधिकारीले बताए । बरामद कपडा तथा मोटरसाइकल र नियन्त्रणमा लिइएका व्यक्तिलाई आवश्यक कानुनी कारबाहीका लागि भन्सार कार्यालयमा बुझाउने प्रक्रिया अघि बढाइएको सशस्त्र प्रहरीले जनाएको छ । 
प्रतिक्रिया दिनुहोस् !