काठमाडौँ, २७ असोज । राजमार्गका होटल तथा रेस्टुरेन्टमा गुणस्तरहीन खाना खाँदा यात्रु बिरामी परेको पाइए अब सम्बन्धित सवारी चालक र होटल सञ्चालकमाथि कानुनी कारबाही हुने भएको छ । यातायात व्यवस्था विभागले मंगलबार सूचना जारी गर्दै यात्रुको स्वास्थ्यमा खेलबाड गर्ने होटल सञ्चालक र त्यस्ता होटलमा सवारी रोकेर खाना खुवाउने चालकलाई कारबाही गर्ने चेतावनी दिएको हो ।
पूर्वाधार विकास मन्त्रालयमा सरोकारवालाबीच भएको छलफलपछि विभागले यस्तो निर्णय सार्वजनिक गरेको हो । विभागले सार्वजनिक यात्रुवाहक सवारीका चालकलाई यात्रुका लागि खाजा, नास्ता तथा खाना उपलब्ध गराउँदा स्वच्छता र गुणस्तरलाई प्राथमिकता दिन निर्देशन दिएको छ ।
विभागका अनुसार चालकहरूले सम्भव भएसम्म खाद्य प्रविधि तथा गुण नियन्त्रण विभागको खाद्य स्वच्छतासम्बन्धी स्टिकर टाँसिएका होटल तथा रेस्टुरेन्टमा मात्रै सवारी रोकेर यात्रुलाई खाना खुवाउने व्यवस्था मिलाउनुपर्नेछ । यात्रुको स्वास्थ्यलाई ध्यानमा राख्दै सफा, स्वच्छ र गुणस्तरीय खाद्य पदार्थ उपलब्ध हुने स्थान छनोट गर्न विभागले आग्रह गरेको छ ।
गुणस्तरहीन खानाले यात्रु बिरामी परे कडा कारबाही
राजमार्गका होटल तथा रेस्टुरेन्टमा उपलब्ध गराइने खाजा, नास्ता र खाना न्यून गुणस्तरको भएको तथा त्यसका कारण यात्रु बिरामी परेको गुनासो प्राप्त भएको विभागले जनाएको छ । यस्ता गतिविधिमाथि सरकारी निकायले सूक्ष्म निगरानी गरिरहेको पनि विभागले स्पष्ट पारेको छ ।
खाना तथा खाजाको गुणस्तरमा लापरबाही गरेको र त्यसबाट यात्रु बिरामी परेको पुष्टि भए सम्बन्धित होटल वा रेस्टुरेन्ट सञ्चालकसँगै त्यहाँ सवारी रोकेर यात्रुलाई खाना खुवाउने चालकलाई समेत प्रचलित कानुनअनुसार कारबाही गरिने विभागको चेतावनी छ ।
खानाको गुणस्तर र मूल्यमा ठगी भए कहाँ गर्ने उजुरी ?
राजमार्गका होटल तथा रेस्टुरेन्टमा खाना, खाजा र नास्ताको स्वच्छता तथा गुणस्तरमा कमी भेटिएमा वा तोकिएकोभन्दा बढी मूल्य लिएर ठगी गरिएमा यात्रुले सम्बन्धित निकायमा उजुरी गर्न सक्नेछन् ।
विभागले यात्रुलाई यस्ता समस्या देखिए नेपाल प्रहरीको हेल्पलाइन ‘१००’ मा फोन गरेर जानकारी गराउन आग्रह गरेको छ । त्यसबाहेक जिल्ला प्रशासन कार्यालय, जिल्ला प्रहरी कार्यालय, ट्राफिक प्रहरी कार्यालय तथा खाद्य प्रविधि तथा गुण नियन्त्रण विभागका सम्बन्धित कार्यालयमा समेत उजुरी दिन सकिनेछ ।
यात्रुको स्वास्थ्य र सुरक्षालाई प्राथमिकतामा राख्दै राजमार्गका होटल तथा रेस्टुरेन्टमा खाद्य स्वच्छता कायम गराउने र मूल्यमा हुने ठगी नियन्त्रण गर्ने उद्देश्यले सरकारले निगरानी बढाएको विभागको सूचनाले देखाएको छ । 
प्रतिक्रिया दिनुहोस् !