काठमाडौँ, २४ असोज । आम जनता पार्टी (आजपा)का अध्यक्ष एवं पूर्वमन्त्री प्रभु साहले भोटेकोशी बाढीपीडितसहित देशभरका प्राकृतिक विपद्बाट प्रभावित नागरिकलाई तत्काल राहत उपलब्ध गराउन र क्षतिग्रस्त संरचनाको पुनर्निर्माणलाई तीव्रता दिन अधिकारसम्पन्न छुट्टै प्राधिकरण गठन गर्न सरकारसँग माग गरेका छन् । दशैं, दीपावली र छठलगायतका चाडपर्व नजिकिँदै गर्दा पनि बाढीपीडितको अवस्था दयनीय रहेको उल्लेख गर्दै अध्यक्ष साहले उनीहरूको पीडालाई बेवास्ता गरेर उत्सव मनाउनुको औचित्यमाथि प्रश्न उठाएका हुन् ।
आजपा काठमाडौं उपत्यका विशेष कमिटीले शनिबार काठमाडौंको कोटेश्वरस्थित पार्टी कार्यालयमा आयोजना गरेको शुभकामना आदानप्रदान कार्यक्रममा बोल्दै साहले विपद्मा परेका नागरिकको उद्धार, राहत, सुरक्षित पुनर्स्थापना र पुनर्निर्माणलाई सरकारले प्राथमिकतामा राख्नुपर्ने बताए । ‘बाढीपीडितको अवस्था विजोग छ । बाढीपीडितलाई हरिबिजोग बनाएर कस्तो चाडपर्व हुन्छ ?’ साहले प्रश्न गरे । उनले विपद्का कारण घरबारविहीन तथा प्रभावित बनेका नागरिकलाई राज्यले अभिभावकत्व प्रदान गर्नुपर्नेमा जोड दिए ।
तत्काल राहत वितरणमा सीमित नभई क्षतिको मूल्यांकन, प्रभावित परिवारको सुरक्षित पुनर्स्थापना र भत्किएका भौतिक संरचनाको पुनर्निर्माणलाई एकीकृत योजनाअन्तर्गत अघि बढाउनुपर्ने उनको भनाइ थियो । भोटेकोशी बाढीबाट प्रभावित नागरिकसहित देशका विभिन्न क्षेत्रमा बाढी, पहिरो तथा अन्य प्राकृतिक विपद्को मारमा परेका परिवारको समस्या समाधान गर्न सरकारले दीर्घकालीन योजना बनाउनुपर्ने साहले बताए । यसका लागि आवश्यक अधिकार र स्रोतसाधनसहितको छुट्टै प्राधिकरण गठन गर्नुपर्ने माग उनले दोहोर्याए ।
महँगी र कालोबजारी नियन्त्रण गर्न सरकार असफल भएको आरोप
अध्यक्ष साहले चाडपर्वको समयमा बजारमा हुने मूल्यवृद्धि, कालोबजारी र कृत्रिम अभाव नियन्त्रण गर्न सरकार असफल भएको आरोप लगाए । दैनिक उपभोग्य वस्तुको सहज उपलब्धता र उचित मूल्य सुनिश्चित गर्नुपर्ने भए पनि बजार अनुगमन प्रभावकारी हुन नसकेको उनको भनाइ थियो ।
खाना पकाउने ग्यासलगायत घरायसी प्रयोजनका अत्यावश्यक सामग्रीको आपूर्ति सहज बनाउन सरकार गम्भीर हुनुपर्ने उनले बताए । कृत्रिम अभाव सिर्जना गरी उपभोक्तालाई महँगो मूल्य तिर्न बाध्य बनाउने प्रवृत्तिविरुद्ध कडा निगरानी र कारबाही गर्न उनले माग गरे ।
चाडपर्वमा पनि अत्यावश्यक सेवा २४सै घण्टा सञ्चालन हुनुपर्ने
साहले दशैं, दीपावली र छठका नाममा अत्यावश्यक सार्वजनिक सेवा अवरुद्ध हुन नहुने बताए । स्वास्थ्य सेवा, शान्ति सुरक्षा, विद्युत्, खानेपानी र सञ्चारजस्ता नागरिकको दैनिक जीवनसँग प्रत्यक्ष जोडिएका सेवा चौबीसै घण्टा सञ्चालन हुने व्यवस्था मिलाउन उनले सरकारको ध्यानाकर्षण गराए ।
‘दशैं, दीपावली वा छठका नाममा अत्यावश्यक सेवा बन्द गर्न मिल्दैन,’ उनले भने, ‘स्वास्थ्य सेवा र शान्ति सुरक्षा २४सै घण्टा सुनिश्चित हुनुपर्छ ।’ चाडपर्वका बेला ठूलो संख्यामा मानिसको आवागमन हुने भएकाले धार्मिक तथा पर्यटकीय स्थलमा सुरक्षा व्यवस्था मजबुत बनाउनुपर्ने उनको भनाइ थियो । सार्वजनिक यातायातलाई व्यवस्थित बनाउँदै यात्रुको सहज आवागमन सुनिश्चित गर्न सरकार र सुरक्षा निकायले विशेष योजना लागू गर्नुपर्ने उनले बताए ।
यातायातमा मनपरी भाडा असुल्नेमाथि कारबाहीको माग
चाडपर्वमा यात्रुको चाप बढेको मौका छोपेर सार्वजनिक यातायातमा मनपरी भाडा असुल्ने र यात्रुलाई दुःख दिने प्रवृत्ति नियन्त्रण गर्न साहले माग गरे । यसका लागि नियमित अनुगमन, भाडादरको प्रभावकारी कार्यान्वयन र नियम उल्लंघन गर्नेमाथि कारबाही आवश्यक रहेको उनले बताए ।
त्यसैगरी, बाढी, पहिरो तथा अन्य कारणले राजमार्ग र मुख्य सडक अवरुद्ध हुँदा यात्रु लामो समयसम्म अलपत्र पर्ने अवस्था अन्त्य गर्न सम्बन्धित निकायलाई तयारी अवस्थामा राख्नुपर्नेमा उनले जोड दिए । सडक अवरोध तत्काल हटाउने, ट्राफिक व्यवस्थापन प्रभावकारी बनाउने तथा सवारी दुर्घटना न्यूनीकरणका लागि विशेष सतर्कता अपनाउनुपर्ने साहको भनाइ थियो ।
आकस्मिक उद्धार तथा राहतका लागि आवश्यक संयन्त्रलाई सक्रिय राख्न र विद्युत्, खानेपानी तथा सञ्चार सेवामा समस्या आउन नदिन पनि उनले आग्रह गरे ।
विपद्पीडित र विपन्न नागरिकप्रति राज्य संवेदनशील बन्नुपर्ने
अध्यक्ष साहले चाडपर्वलाई उत्सवका रूपमा मात्र नभई विपद्मा परेका नागरिकको दुःख र पीडा सम्झने अवसरका रूपमा लिनुपर्ने बताए । राज्यले सबै नागरिकलाई समान व्यवहार गर्दै गरिब, विपन्न तथा विपद्पीडित परिवारको जीवन सहज बनाउन विशेष ध्यान दिनुपर्ने उनको भनाइ थियो ।
उनले दशैं, दीपावली र छठलगायतका पर्वको शुभकामना दिँदै चाडपर्वका समयमा नागरिकको सुरक्षा, सेवा प्रवाह र दैनिक जीवन सहज बनाउने विषयमा सरकारलाई संवेदनशील बन्न आग्रह गरे । आजपा काठमाडौं उपत्यका विशेष कमिटीका अध्यक्ष पासाङ तामाङको अध्यक्षतामा सम्पन्न कार्यक्रममा पार्टीका सहअध्यक्ष तिलक थापामगर, उपाध्यक्ष धनकुमारी मगर, महासचिव त्रिभुवन साह, उपमहासचिव देवी पण्डित रेग्मी, प्रवक्ता सुभाष साह र सचिव विजय यादव लगायतका नेताकार्यकर्ताको सहभागिता थियो । कार्यक्रमको सञ्चालन उपत्यका विशेष कमिटीका सचिव रवि ध्वज कार्कीले गरेका थिए ।
प्रतिक्रिया दिनुहोस् !