वीरगंज (पर्सा), २४ असोज । पर्साका विभिन्न सीमा नाकाबाट भन्सार छली गरी भित्र्याइएका १४ लाख ३६ हजार रुपैयाँभन्दा बढी मूल्यका सामान सशस्त्र प्रहरीले बरामद गरेको छ । बरामद सामग्री ओसारपसारमा प्रयोग गरिएका दुईवटा ई–लोडरसमेत नियन्त्रणमा लिइएको छ । सशस्त्र प्रहरी बल नेपाल नं. १३ गण हेडक्वार्टर पर्साको टोलीले शुक्रबार वीरगंज महानगरपालिका–१४ स्थित गण्डक चोकबाट बिलबिजक नभएका सामानसहित दुईवटा ई–लोडर नियन्त्रणमा लिएको हो ।
सशस्त्र प्रहरीका अनुसार ई–लोडरमा लोड गरिएका कपडा, भाँडाबर्तन, टमाटर तथा किराना सामान बरामद गरिएको छ । नियन्त्रणमा लिइएका दुईवटा ई–लोडरको मूल्य १० लाख रुपैयाँ र त्यसमा लोड गरिएका सामानको मूल्य ३ लाख ३४ हजार ९४५ रुपैयाँ रहेको छ । यसरी गण्डक चोकबाट मात्रै १३ लाख ३४ हजार ९४५ रुपैयाँ बराबरको सामग्री बरामद भएको हो ।
यसैगरी वीरगंज महानगरपालिका–१६ स्थित इनर्वा सीमा क्षेत्रबाट सीमा सुरक्षा गुल्म वीरगंजको टोलीले भारतबाट भन्सार छली गरी ल्याउँदै गरेको किराना तथा कस्मेटिक सामान बरामद गरेको छ । उक्त सामानको मूल्य १ लाख १ हजार ६९० रुपैयाँ रहेको सशस्त्र प्रहरीले जनाएको छ । दुवै स्थानबाट बरामद गरिएका सामान र ई–लोडरको कुल मूल्य १४ लाख ३६ हजार ६३५ रुपैयाँ पुगेको छ ।
सशस्त्र प्रहरी बल पर्साका सूचना अधिकारी तथा सशस्त्र प्रहरी नायब उपरीक्षक सुरज क्षेत्रीका अनुसार बरामद गरिएका सम्पूर्ण सामान र दुवै ई–लोडर आवश्यक कानुनी कारबाहीका लागि वीरगञ्ज भन्सार कार्यालय पर्सामा बुझाइएको छ । 
प्रतिक्रिया दिनुहोस् !