गौर (रौतहट), २४ असोज । दसैँ, तिहार तथा छठ पर्वका बेला यात्रुले भोग्नुपर्ने समस्या, सार्वजनिक यातायातमा हुने ठगी र मनपरी भाडा असुली नियन्त्रण गर्ने उद्देश्यले रौतहटमा यात्रु सहायता कक्ष सञ्चालनमा ल्याइएको छ । चाडपर्वमा यात्रुको चाप बढ्ने समयलाई लक्षित गर्दै जिल्लाका चार स्थानमा सहायता कक्ष स्थापना गरिएको छ भने चन्द्रनिगाहपुरमा यात्रुका लागि रिफ्रेस सेन्टरसमेत सञ्चालन गरिएको छ ।
जिल्ला प्रहरी कार्यालय गौर र जिल्ला ट्राफिक प्रहरी कार्यालय चन्द्रनिगाहपुरको संयुक्त आयोजनामा सहायता कक्ष स्थापना गरिएको जिल्ला ट्राफिक प्रहरी कार्यालय रौतहटका प्रमुख प्रहरी निरीक्षक राजेन्द्र थापामगरले जानकारी दिए । उनका अनुसार चन्द्रपुर नगरपालिका–४ स्थित चन्द्रनिगाहपुर मेनचोक, गरुडा नगरपालिका–४ को गरुडा बजार, बौधीमाई नगरपालिका–७ को बंकुल चोक र गौर नगरपालिका–८ स्थित गौर बसपार्कमा सहायता कक्ष सञ्चालनमा ल्याइएको हो ।
चाडपर्वका बेला यात्रुको आवागमन बढ्ने र यही अवसरमा यात्रुले विभिन्न समस्या भोग्नुपर्ने सम्भावना रहेकाले उनीहरूको यात्रा सुरक्षित, सहज र व्यवस्थित बनाउन यस्तो व्यवस्था गरिएको थापामगरले बताए । सहायता कक्षमार्फत यात्रुले सार्वजनिक सवारीसाधनमा बढी भाडा असुलिएको, ठगीमा परेको वा यात्राका क्रममा अन्य समस्या भोग्नुपरेको विषयमा प्रहरीलाई जानकारी गराउन सक्नेछन् । यात्रुका गुनासा सुन्ने र आवश्यक सहजीकरण गर्ने माध्यमका रूपमा सहायता कक्षले काम गर्ने प्रहरीको अपेक्षा छ ।
यसैबीच, लामो दूरीको यात्रा गर्ने यात्रुलाई आराम तथा आधारभूत सुविधा उपलब्ध गराउने उद्देश्यले जिल्ला ट्राफिक प्रहरी कार्यालय चन्द्रनिगाहपुरअगाडि रिफ्रेस सेन्टर पनि सञ्चालनमा ल्याइएको छ । उक्त सेन्टरमा शुद्ध खानेपानी र शौचालयको सुविधा उपलब्ध गराइएको प्रहरी निरीक्षक थापामगरले बताए ।
प्रहरीका अनुसार सहायता कक्ष र रिफ्रेस सेन्टर सञ्चालनले यात्रुको समस्या समाधान गर्न, सडक सुरक्षा कायम राख्न तथा चाडपर्वका बेला यातायात व्यवस्थापन प्रभावकारी बनाउन सहयोग पुग्नेछ । प्रहरीले यात्राका क्रममा ट्राफिक नियम पालना गर्न, सवारीसाधनको अवस्था जाँच गरेर मात्र यात्रा गर्न तथा बढी भाडा असुली वा अन्य समस्या भए नजिकैको यात्रु सहायता कक्षमा जानकारी गराउन सर्वसाधारणलाई आग्रह गरेको छ । 
प्रतिक्रिया दिनुहोस् !