जितपुरसिमरा (बारा), २५ असोज । बाराको जितपुरसिमरा उपमहानगरपालिकामा घरपछाडि सरसफाइ गर्ने क्रममा नाङ्गो तार छुँदा करेन्ट लागेर एक महिलाको मृत्यु भएको छ । मृत्यु हुनेमा जितपुरसिमरा उपमहानगरपालिका–१४ बेहरी निवासी रामचन्द्र महतोकी ४५ वर्षीया श्रीमती सिरिया देवी महतो रहेकी छन् ।
प्रहरीका अनुसार शनिबार दिउँसो करिब १ः५० बजे आफ्नै घरपछाडि सरसफाइ गरिरहेका बेला नाङ्गो तार छुँदा सिरिया देवीलाई करेन्ट लागेको थियो । करेन्ट लागेर गम्भीर घाइते भएकी उनलाई उनका श्रीमान् रामचन्द्रले तत्काल उपचारका लागि सिमरास्थित सिटी स्टार अस्पताल पुर्याएका थिए ।
अस्पतालमा चिकित्सकले ईसीजी परीक्षण गरेपछि दिउँसो करिब २ बजे उनलाई मृत घोषणा गरेका थिए । घटनाबारे जानकारी प्राप्त हुनासाथ इलाका प्रहरी कार्यालय सिमरा, बाराबाट प्रहरी निरीक्षक विनोदराज खत्रीको कमान्डमा सोको (एस.ओ.सि.ओ.)सहितको प्रहरी टोली घटनास्थल पुगेको थियो ।
प्रहरीले घटनास्थलको मुचुल्का तयार गरी घटनाबारे थप अनुसन्धान अघि बढाएको जनाएको छ । मृतकको शव सिटी स्टार अस्पतालमै राखिएको प्रहरीले जानकारी दिएको छ । 
प्रतिक्रिया दिनुहोस् !