वीरगंज (पर्सा), १९ भदौ । भोटेकोशी तथा त्रिशूली क्षेत्रमा आएको विनाशकारी बाढीपछि प्रभावित क्षेत्रमा खोज तथा उद्धार अभियानलाई तीव्र पारिएको छ । नेपाली सेना, सशस्त्र प्रहरी, नेपाल प्रहरी, गैरसैनिक जनशक्ति तथा सम्बन्धित जलविद्युत् आयोजनाका टोलीहरू प्रभावित क्षेत्रमा परिचालन भई सुरुङ, खोला, बस्ती, जंगल तथा पहाडी क्षेत्रमा खोजी तथा उद्धार गरिरहेका छन् ।
२०८३ भाद्र १९ गते साँझ ७ बजेसम्म नेपाली सेनाका ७ तथा गैरसैनिक ६ वटा हवाई साधन परिचालन गरी विभिन्न प्रभावित क्षेत्रबाट ५८ जनाको उद्धार गरिएको छ । बाढीका कारण जलविद्युत् आयोजनाका सुरुङभित्र समेत मानिसहरू फसेपछि सुरुङ केन्द्रित उद्धार अभियानलाई विशेष प्राथमिकता दिइएको छ ।
त्रिशूली–३ ए को सुरुङबाट दुई जनाको जीवितै उद्धार
त्रिशूली–३ ए जलविद्युत् आयोजनाको सुरुङभित्र फसेका व्यक्तिको उद्धारका लागि नेपाली सेनाका ७५, सशस्त्र प्रहरी बल नेपालका १८ तथा नेपाल प्रहरी र विज्ञसहितको संयुक्त टोली परिचालन गरिएको छ । टोलीले दुई जनालाई जीवितै उद्धार गरी थप उपचारका लागि हेलिकप्टरमार्फत वीरेन्द्र अस्पताल छाउनी ल्याएको छ । खोजीका क्रममा सुरुङबाट एक शवसमेत निकालिएको छ भने अन्य सम्भावित व्यक्तिको खोज तथा उद्धार कार्य जारी रहेको छ ।
त्यस्तै, त्रिशूली–३ बी आयोजनामा नेपाली सेनाका ८९, गैरसैनिक ३ जना तथा आयोजनाका प्रबन्ध निर्देशकसहितको संयुक्त टोलीले आयोजनाको कार्यालय र निवास रहेको क्षेत्रमा करिब १५ फिट गहिरो खाडल खनेर खोजी गरेको छ । हालसम्म त्यहाँबाट केही फेला नपरेको जनाइएको छ । त्रिशूली–३ एसँग ‘लिङ्कअप’ गराउन एक्साभेटरको प्रयोग गरी करिब ७०० मिटर बाटो सफा गर्ने काम समेत गरिएको छ ।
लाङटाङ हाइड्रोको सुरुङमा दुई शव फेला
लाङटाङ हाइड्रोमा नेपाली सेनाका २५ जना तथा दुई गैरसैनिक सदस्यसहितको संयुक्त टोलीले सुरुङभित्र प्रवेश गरी दुई वटा शव फेला पारेको छ । त्यहाँ थप खोज तथा उद्धार कार्य जारी रहेको छ । चिलिमे हाइड्रोमा विदेशीसहितको संयुक्त टोलीले जेनेरेटर र ‘मड पम्प’ प्रयोग गरी सुरुङभित्र जमेको लेदो हटाउने काम गरिरहेको छ । टोलीले पुनः १०० मिटर भित्रसम्म पुगेर खोजी अघि बढाएको छ ।
यसैगरी, माथिल्लो त्रिशूली–१ को हाकुस्थित सुरुङमा नेपाली सेनाका १७ जना तथा आयोजनाका प्रतिनिधिसहितको संयुक्त टोलीले र्याफ्ट र बोटको प्रयोग गर्दै खोजी गरिरहेको छ । सुरुङमा जम्मा भएको पानी निकाल्ने कार्यसमेत भइरहेको छ ।
तादी नदीमा पुल जडानका लागि सेनाको टोली परिचालन
बाढीबाट क्षतिग्रस्त तथा अवरुद्ध यातायात सम्पर्क पुनःस्थापित गर्ने उद्देश्यले देवीघाटस्थित तादी नदीमा पुल जडानको तयारीसमेत अघि बढाइएको छ । नेपाली सेनाको इन्जिनियरिङ फौजका ५५ जना जनशक्ति खटिएर पुल जडानका लागि बेस निर्माण गरिरहेका छन् । त्यहाँ जडान गर्न गजुरीमा रहेको एक्रो ब्रिजका केही भाग त्रिशूली पुर्याइसकिएको छ भने बाँकी आवश्यक सामग्रीसमेत ढुवानी भइरहेको छ ।
प्रभावित बस्तीमा पैदल गस्ती गर्दै स्वास्थ्य सेवा
जमिनबाट हुने खोज तथा उद्धारलाई समेत निरन्तरता दिइएको छ । प्रभावित क्षेत्रका जंगल, डाँडा, खोला तथा बस्तीहरूमा पैदल गस्ती गर्दै स्थानीय बासिन्दालाई सुरक्षा प्रत्याभूति दिलाउने तथा आवश्यक स्वास्थ्य सेवा उपलब्ध गराउने काम भइरहेको छ । चिकित्सक अधिकृतसहितको टोलीले प्रभावित नागरिकलाई स्वास्थ्य सेवा प्रदान गरिरहेको छ ।
रसुवाको टिमुरेदेखि नुवाकोट, धादिङ, चितवन र नवलपरासी पूर्वका प्रभावित क्षेत्रसम्म नेपाली सेनाका ९ हजार ३ सयभन्दा बढी फौज प्रत्यक्ष रूपमा परिचालन भएका छन् । परिचालित टोलीले समन्वयात्मक रूपमा घाइते तथा प्रभावितको खोज तथा उद्धार, शव व्यवस्थापनमा सहयोग, बाढी तथा पहिरोका कारण अवरुद्ध सडक खुलाउने र आपत्कालीन उपचारलगायतका कामलाई निरन्तरता दिइरहेको छ ।
हवाई उद्धारदेखि सुरुङभित्रको जोखिमपूर्ण खोजी र जमिनमा व्यापक परिचालनसम्मका अभियान तीव्र भइरहे पनि जलविद्युत् आयोजनाका सुरुङ तथा बाढी प्रभावित दुर्गम क्षेत्रमा थप व्यक्ति फसेको हुनसक्ने आशंकाबीच खोजी कार्यलाई निरन्तरता दिइएको छ । यो समाचार नेपाली सेनाको आधिकारिक फेसबुक पेजमा उपलब्ध गराइएको विवरणको आधारमा तयार पारिएको छ ।
प्रतिक्रिया दिनुहोस् !