वीरगंज (पर्सा), १९ भदौ । रसुवाको भोटेकोशी नदीमा आएको विनाशकारी बाढीपछि माथिल्लो त्रिशूली–३ ‘ए’ जलविद्युत् आयोजनाको सुरुङभित्र १० दिनदेखि सम्पर्कविहीन रहेका दुई जनालाई नेपाली सेना र सशस्त्र प्रहरीको उद्धार टोलीले जीवितै उद्धार गरेपछि निराश बन्दै गएका परिवारमा आशाको किरण पलाएको छ ।
शुक्रबार बिहान आयोजनाको सुरुङबाट सप्तरीको तिलाठी कोइलाडी गाउँपालिका–४ का सञ्जयकुमार साह र कवीर महर्जनलाई सकुशल उद्धार गरिएको हो । उद्धार गरिएकामध्ये साह मेकानिकल फोरम्यान तथा महर्जन मेकानिकल सुपरभाइजरका रूपमा कार्यरत थिए । उनीहरू भदौ १० गते भोटेकोशीमा आएको बाढीका क्रममा आयोजनाको प्राविधिक काममा संलग्न रहेकै अवस्थामा सुरुङभित्र थुनिएका थिए ।
सञ्जय जीवितै भेटिएको खबरले सप्तरीस्थित उनको परिवारमा १० दिनदेखि चलिरहेको रुवाबासी एकाएक खुसीमा परिणत भएको छ । बाढीपछि छोराको अवस्थाबारे कुनै जानकारी नपाउँदा उनका बुबा देवसाह, आमा कपुरदेवी, श्रीमती लक्ष्मी तथा भाइबहिनी निरन्तर चिन्तामा थिए । सञ्जय जीवितै उद्धार भएको खबर सुनेपछि भने परिवारजन काठमाडौंस्थित अस्पतालतर्फ लागेका छन् ।
सञ्जयका भाइ सञ्जीवका अनुसार उद्धारको खबर सुन्दा बुबा भावविह्वल बनेका थिए । केही दिनदेखि निराश बनेको परिवारमा अचानक खुसी छाएको उनले बताए । श्रीमती लक्ष्मीलाई श्रीमान् बेपत्ता भएपछि सम्हालिन कठिन भएपछि माइती पठाइएको थियो ।
अरूलाई बचाउँदा आफैं फसे
सञ्जयको उद्धारसँगै उनको साहस र कर्तव्यनिष्ठाको कथा पनि सार्वजनिक भएको छ । बाढी र दुर्घटनाको समयमा उनी आयोजनाको कन्ट्रोल रुममा कार्यरत थिए । कन्ट्रोल रुममा आफू जिम्मेवार व्यक्ति भएकाले एक्लै भागेर आफ्नो ज्यान जोगाउनुको सट्टा अरू कर्मचारीलाई सुरक्षित स्थानतर्फ पठाउन उनी लागिपरे ।
उद्धारपछि नेपाली सेनाका अधिकारीहरूसँग कुरा गर्दै सञ्जयले आफूले सबैलाई बाहिर भाग्न लगाएको तर अरूलाई बचाउने क्रममा आफ्नो समय बितेकाले अन्तिममा आफू बाहिर निस्कन नसकेको बताएका छन् । ‘कन्ट्रोल रुममा काम गर्थेँ । म भएपछि मेरो कर्तव्य सबैको ज्यान बचाउनु थियो । दुर्घटना भएपछि म एक्लै भागेर भएन, सबैलाई बचाउनुपर्यो,’ उनले भनेका छन् ।
सबैलाई बाहिर निकाल्ने प्रयास गर्दागर्दै रात परेपछि आफू सुरुङभित्रै फसेको उनले बताएका छन् । लामो समयसम्म अँध्यारो सुरुङभित्र बस्दा आफूले भगवान्को महामन्त्र जपेर समय बिताएको र त्यसैले आफू बाँच्न सफल भएको उनको विश्वास छ ।
‘टनेलभित्र अझै धेरै जना हुन सक्छन्’
सुरुङबाट बाहिर आएपछि सञ्जयले उद्धारकर्मीलाई दिएको जानकारीले भने उद्धारको चुनौती अझै सकिएको छैन भन्ने संकेत गरेको छ । उनका अनुसार बाढी आउनुअघि आयोजनाको उक्त क्षेत्रमा करिब ४० देखि ४५ जना मानिस रहेको हुन सक्ने अवस्था थियो । आफूले नजिकै रहेका तीन–चार जना साथीहरूसँग मात्र सम्पर्क गर्न सकेको र लामो सुरुङ तथा पावरहाउसतर्फ पनि मानिसहरू फसेको हुन सक्ने उनले बताएका छन् ।
‘टनेल लामो छ । त्यहाँ पानी पनि भित्र पसेको होला,’ उनले उद्धारकर्मीहरूसँग भनेका छन् । नेपाल विद्युत् प्राधिकरणका अनुसार सुरुङभित्र रहेको विद्युत् गृह क्षेत्रमा करिब ४२ जना इन्जिनियर तथा कर्मचारी फसेको अनुमान गरिएको छ । उद्धार गरिएका दुई जनालाई पावरहाउस पुग्ने सुरुङको बाटोबाट जीवितै फेला पारिएको आयोजनाका प्रमुख आवास ओझाले बताएका छन् । तर, उनीहरूलाई पावरहाउसबाट कति दूरीमा भेटिएको थियो भन्ने अँध्यारोका कारण यकिन गर्न नसकिएको उनले बताए ।
सञ्जयले सुरुङभित्र सबैजना जीवित रहेको हुन सक्ने बताएपनि वास्तविक रूपमा कति जना कहाँ छन् भन्ने यकिन हुन सकेको छैन । त्यसैले बाँकी सुरुङमा फसेकाहरूको खोजी र उद्धार कार्य अझै चुनौतीपूर्ण बनेको छ ।
१० दिनपछि फर्किएको खुसी
भदौ १० गते बिहान परिवारसँग अन्तिम पटक कुरा गरेपछि सञ्जय सम्पर्कविहीन भएका थिए । बाढी आएको खबर पाएपछि परिवारले पटक–पटक उनको मोबाइलमा फोन गर्यो, सामाजिक सञ्जाल तथा सञ्चारमाध्यममा आएका नामावली र उद्धारसम्बन्धी समाचार हेर्दै उनको अवस्थाबारे जानकारी पाउने प्रतीक्षा गर्यो । दिन बित्दै जाँदा आशा कमजोर हुँदै गएको थियो ।
तर, १० दिनपछि सुरुङभित्रबाट जीवितै बाहिर निस्किएको खबरले परिवारको लामो पीडा खुसीमा बदलियो । उनकी बहिनी सुधाले सञ्जय सुरक्षित भेटिएको खबरले अन्य सम्पर्कविहीनका परिवारमा समेत नयाँ आशा जगाएको बताइन् । ‘मेरो दाइ सुरुङभित्र सुरक्षित भेटिएजस्तै अरू सम्पर्कविहीनहरू पनि सुरक्षित भेटिऊन्,’ उनको कामना छ ।
कवीर महर्जनको परिवारमा पनि यस्तै खुसी छाएको छ । उनका भाइ अमिर महर्जनले १० दिनपछि दाइ जीवितै उद्धार भएको खबरले परिवारमा खुसीको सीमा नै नरहेको बताए । उनले उद्धारमा खटिएका नेपाली सेना, सशस्त्र प्रहरी र उद्धार विशेषज्ञप्रति आभार व्यक्त गरेका छन् ।
उद्धारले जगायो नयाँ आशा
भोटेकोशी बाढीपछि विभिन्न जलविद्युत् आयोजना तथा सुरुङमा फसेका र सम्पर्कविहीन रहेका व्यक्तिका परिवारका लागि सञ्जय र कवीरको जीवित उद्धार ठूलो आशाको खबर बनेको छ । गृहमन्त्री सुधन गुरुङले पनि १० दिनपछि दुई जनाको जीवित उद्धार हुनुलाई ‘आशाको किरण’ भनेका छन् । उद्धार टोलीहरू अझै पनि अन्य सुरुङमा निरन्तर खोजी तथा उद्धारमा खटिरहेको उनले बताएका छन् । उद्धार गरिएका दुवै जनालाई थप उपचार तथा स्वास्थ्य परीक्षणका लागि काठमाडौं ल्याउने तयारी गरिएको र उनीहरूको स्वास्थ्य अवस्था सामान्य रहेको जनाइएको छ ।
भोटेकोशी बाढीले सिर्जना गरेको त्रासदीबीच १० दिनसम्म अँध्यारो सुरुङमा जीवनसँग संघर्ष गरेर बाहिर आएका सञ्जयका लागि यो वास्तवमै ‘दोस्रो जीवन’ हो । तर, उनको जीवित उद्धारले उनी र उनको परिवारलाई मात्र होइन, अझै आफ्ना आफन्तको खबरको प्रतीक्षामा रहेका कैयौँ परिवारलाई पनि एउटै सन्देश दिएको छ आशा अझै बाँकी छ ।
प्रतिक्रिया दिनुहोस् !