वीरगंज (पर्सा), १६ असार । बाराको जितपुरसिमरा उपमहानगरपालिका–२ स्थित एयरपोर्ट नजिक भएको सवारी दुर्घटनामा परी वीरगंजका एक किशोरको मृत्यु भएको छ भने अन्य दुई जना घाइते भएका छन् । मृत्यु हुनेमा पर्साको वीरगन्ज महानगरपालिका–२९ निवासी १७ वर्षीय लक्की सर्राफ रहेका छन् ।
सोमबार बेलुका डुमरवाना–सिमरा भित्री सडकखण्डमा स्कुटर, मोटरसाइकल र ट्र्याक्टर एकआपसमा ठोक्किँदा उनी गम्भीर घाइते भएका थिए । उपचारका लागि तत्काल परवानीपुरस्थित एलएस न्युरो अस्पताल पुर्याइए पनि चिकित्सकले उनलाई मृत घोषणा गरेका थिए । प्रहरीका अनुसार ना २८ प ५८५५ नम्बरको स्कुटर चलाइरहेका सर्राफ डुमरवानाबाट सिमरातर्फ जाँदै थिए ।
सोही दिशामा अघि गुडिरहेको प्र.२–०३–००१ त ३७७३ नम्बरको ट्र्याक्टरलाई ओभरटेक गर्ने क्रममा विपरीत दिशाबाट आउँदै गरेको म.प्र.०३–०४१ प २२७४ नम्बरको मोटरसाइकलसँग स्कुटर ठोक्किएको थियो । मोटरसाइकलसँग ठोक्किएपछि स्कुटर अनियन्त्रित भई ट्र्याक्टरमुनि पसेको र त्यसक्रममा सर्राफ गम्भीर घाइते भएको प्रहरीले जनाएको छ ।
दुर्घटनामा स्कुटरको पछाडि सवार १७ वर्षीय दिलसाद देवान सामान्य घाइते भएका छन् । उपचारपछि उनलाई अस्पतालबाट डिस्चार्ज गरिएको प्रहरीले जनाएको छ । त्यसैगरी मोटरसाइकल चालक जितपुरसिमरा–२३ निवासी २९ वर्षीय रइफुल आलम अन्सारी पनि घाइते भएका छन् । उनको थप उपचारका लागि वीरगञ्जस्थित वीरगन्ज हेल्थ केयर अस्पतालमा रिफर गरिएको छ ।
घटनापछि ट्र्याक्टर चालक जितपुरसिमरा–४ औराहा निवासी ७० वर्षीय शिवराज चौधरीलाई इलाका प्रहरी कार्यालय सिमराले नियन्त्रणमा लिएको छ । दुर्घटनाबारे आवश्यक कानुनी प्रक्रिया अघि बढाइएको र थप अनुसन्धान जारी रहेको प्रहरीले जनाएको छ ।
प्रतिक्रिया दिनुहोस् !