कृष्णासवरण (सप्तरी), १९ असोज । सप्तरीमा १० वर्षअघि घरबाट हराएका एक बालकलाई प्रहरीले भारतको नयाँ दिल्लीबाट खोजी गरी परिवारको जिम्मा लगाएको छ । अग्नीसाइर कृष्णासवरण गाउँपालिका–६ का ऋषिदेव सदाका छोरा १६ वर्षीय शिवकुमार सदा १० वर्षअघि आफ्नै घरबाट हराएका थिए । लामो समयसम्म सम्पर्कविहीन भएपछि परिवारले उनको खोजी गर्दै आएको थियो ।
खोजीका क्रममा शिवकुमार भारतको नयाँ दिल्लीमा रहेको जानकारी पाएपछि जिल्ला प्रहरी कार्यालय सप्तरीले दिल्लीस्थित किङ इन्डिया संस्थासँग समन्वय गरी खोजी अघि बढाएको थियो । संस्थाले शिवकुमारलाई फेला पारेपछि निर्देशक नवीन जोशीले जिल्ला प्रहरी कार्यालय सप्तरीका निमित्त कार्यालय प्रमुख एवं प्रहरी नायब उपरीक्षक हेमराज घिमिरेसँग समन्वय गरेका थिए ।
त्यसपछि आइतबार शिवकुमारलाई जिल्ला प्रहरी कार्यालय सप्तरीमा ल्याई बुझाइएको थियो । प्रहरीले अग्नीसाइर कृष्णासवरण गाउँपालिका–६ का जनप्रतिनिधिको रोहवरमा उनलाई अभिभावकको जिम्मा लगाएको जनाएको छ ।
प्रतिक्रिया दिनुहोस् !