वीरगंज (पर्सा), १६ असार । पर्साको जिराभवानी गाउँपालिका–४ स्थित ऐलानी जग्गामा सार्वजनिक जग्गाको संरक्षण, हरियाली विस्तार तथा वातावरणीय सन्तुलन कायम गर्ने उद्देश्यले वृक्षरोपण गरिएको छ । डिभिजन वन कार्यालय पर्साले ‘समृद्धिका लागि वन परियोजना’ अन्तर्गत विभिन्न प्रजातिका बिरुवा रोप्नुका साथै तिनको संरक्षणका लागि सुरक्षित तारबारको व्यवस्था गरेको जनाएको छ ।
वृक्षरोपण कार्यक्रममा प्रमुख अतिथिका रूपमा सहभागी पर्साका प्रमुख जिल्ला अधिकारी भोला दाहालले वन तथा वातावरण संरक्षण वर्तमान समयको प्रमुख आवश्यकता भएको बताए । उनले वृक्षरोपणले जलवायु परिवर्तनका असर न्यूनीकरण, जैविक विविधताको संरक्षण तथा भावी पुस्ताका लागि स्वच्छ र स्वस्थ वातावरण निर्माणमा महत्वपूर्ण योगदान पुर्याउने धारणा व्यक्त गरे । उनले रोपिएका बिरुवाको दीर्घकालीन संरक्षणका लागि स्थानीय समुदायको सक्रिय सहभागिता अपरिहार्य रहेको उल्लेख गर्दै यस्ता वातावरण संरक्षणसम्बन्धी कार्यक्रमलाई निरन्तरता दिनुपर्नेमा जोड दिए ।
गादीमाई साझेदारी वन उपभोक्ता समूहका अध्यक्ष सहरुम राउत गदीको अध्यक्षतामा सम्पन्न कार्यक्रममा पूर्वसांसद जयप्रकाश थारु, पर्साका सशस्त्र प्रहरी उपरीक्षक मोहनबहादुर क्षेत्री, जगरनाथपुर गाउँपालिकाका अध्यक्ष श्रीकान्तप्रसाद यादव, प्रमुख प्रशासकीय अधिकृत सन्देशकुमार यादव, जिराभवानी गाउँपालिकाकी उपाध्यक्ष रेखा चौधरी, डिभिजन वन कार्यालय पर्साका प्रमुख मन्जुर अहमद तथा जिराभवानी गाउँपालिका–४ का वडाध्यक्ष राजेश्वर दास थारुलगायतको सहभागिता रहेको थियो ।
प्रतिक्रिया दिनुहोस् !