वीरगंज (पर्सा), ७ असार । पर्साको छिपहरमाई गाउँपालिकाका अध्यक्ष मनोजकुमार गुप्ताले गाउँपालिका क्षेत्रभित्रका सार्वजनिक (एलानी) जग्गा अतिक्रमण गरी कब्जा गरेर बसेका व्यक्तिहरूलाई तत्काल जग्गा खाली गर्न कडा चेतावनी दिएका छन् ।
विशेष अदालतबाट सफाइ पाएपछि सार्वजनिक सम्पत्ति संरक्षण अभियानलाई थप तीव्र बनाएका अध्यक्ष गुप्ताले सामाजिक सञ्जालमार्फत अतिक्रमणकारीहरूलाई अन्तिम सूचना जारी गरेका हुन् । उनले गाउँपालिकाभित्र रहेका एलानी जग्गा बिघौंका दरले कब्जा गरेर बसेकाहरूलाई स्वेच्छाले जग्गा खाली गरी आफ्नो प्रतिष्ठा जोगाउन आग्रह गरेका छन् ।
अध्यक्ष गुप्ताका अनुसार गाउँपालिकाले पटक–पटक सूचना जारी गर्दा समेत अटेर गर्ने व्यक्तिहरूले अबको सूचनालाई अन्तिम अवसरका रूपमा लिनुपर्नेछ । उनले सार्वजनिक जग्गा संरक्षण सम्बन्धी नेपाल सरकारको निर्णय कार्यान्वयनमा सहयोग गर्न सबैसँग अपिल समेत गरेका छन् । गाउँपालिकाले लामो समयदेखि सार्वजनिक जग्गाको संरक्षण तथा अतिक्रमण हटाउने अभियान सञ्चालन गर्दै आएको छ । अध्यक्ष गुप्ताको पछिल्लो अभिव्यक्तिलाई सोही अभियानको निरन्तरताका रूपमा हेरिएको छ ।
उनले चेतावनीलाई बेवास्ता गरी सार्वजनिक जग्गा कब्जामै रहिरहने व्यक्तिमाथि कानुनी तथा प्रशासनिक प्रक्रिया अघि बढाइने संकेत दिएका छन् । सार्वजनिक सम्पत्तिको संरक्षणमा कुनै सम्झौता नगर्ने अडानसहित गाउँपालिका अब थप सक्रिय रूपमा अघि बढ्ने उनको भनाइ छ । विशेष अदालतको फैसलापछि अध्यक्ष गुप्ता सार्वजनिक सम्पत्ति संरक्षण र अतिक्रमण नियन्त्रण अभियानमा अझ दृढताका साथ लागिपरेको चर्चा स्थानीयस्तरमा भइरहेको छ । 
प्रतिक्रिया दिनुहोस् !