सिम्रौनगढ (बारा), ६ असार । बाराको सिम्रौनगढ नगरपालिकाले आगामी आर्थिक वर्ष २०८३/०८४ का लागि ६१ करोड ६३ लाख ८० हजार रुपैयाँ बराबरको नीति, कार्यक्रम तथा बजेट सार्वजनिक गरेको छ। कृषि, पशुपालन, शिक्षा, स्वास्थ्य, खेलकुद, भौतिक पूर्वाधार, सामाजिक तथा सांस्कृतिक विकासलाई केन्द्रमा राख्दै नगरपालिकाले आफ्नो आगामी वार्षिक योजना अघि सारेको हो ।
शनिबार सम्पन्न नगरपालिकाको ११औँ नगरसभामा नगर प्रमुख किशोरी प्रसाद कलवारले आगामी आर्थिक वर्षका लागि नीति तथा बजेट प्रस्तुत गरेका हुन् । प्रस्तुत बजेटमा उत्पादनमुखी क्षेत्रको प्रवद्र्धन, आधारभूत सेवाको विस्तार तथा स्थानीय विकासलाई मुख्य प्राथमिकतामा राखिएको जनाइएको छ ।
बजेटका लागि संघीय सरकारबाट विभिन्न शीर्षकमा उल्लेख्य अनुदान प्राप्त हुने अनुमान गरिएको छ । जसअनुसार वित्तीय समानीकरण अनुदानअन्तर्गत १३ करोड ४६ लाख रुपैयाँ, सशर्त अनुदानतर्फ २४ करोड ७७ लाख रुपैयाँ, पूँजीगत सशर्त अनुदान २ करोड ११ लाख रुपैयाँ तथा समपूरक अनुदान ५३ लाख रुपैयाँ प्राप्त हुने अपेक्षा गरिएको छ ।
त्यसैगरी प्रदेश सरकारबाट वित्तीय समानीकरण अनुदान ९३ लाख ९० हजार रुपैयाँ प्राप्त हुने अनुमान गरिएको छ । साथै समपूरक अनुदानतर्फ २० लाख रुपैयाँ, विशेष अनुदान ३० लाख रुपैयाँ, सशर्त अनुदान ४० लाख रुपैयाँ तथा राजस्व बाँडफाँडमार्फत ८८ लाख ५७ हजार रुपैयाँ प्राप्त हुने प्रक्षेपण गरिएको छ ।
नगरपालिकाको आय स्रोतमा संघीय राजस्व बाँडफाँडबाट प्राप्त हुने मूल्य अभिवृद्धि कर (भ्याट) ८ करोड २५ लाख ५३ हजार रुपैयाँ तथा अन्तःशुल्कबाट ३ करोड ५३ लाख ८० हजार रुपैयाँ समावेश गरिएको छ । यस्तै मालपोत कार्यालयमार्फत घरजग्गा रजिस्ट्रेसन दस्तुरबापत ६५ लाख रुपैयाँ प्राप्त हुने अनुमान गरिएको छ । आन्तरिक स्रोततर्फ नगरपालिकाले ४ करोड १० लाख रुपैयाँ राजस्व संकलन गर्ने लक्ष्य लिएको छ भने बैंक मौज्दातबाट १ करोड रुपैयाँ तथा सडक बोर्डबाट ५० लाख रुपैयाँ प्राप्त हुने अपेक्षा गरिएको छ ।
नगर प्रमुख कलवारको अध्यक्षतामा सम्पन्न नगरसभामा उपप्रमुख नजमु शेहर, विभिन्न वडाका अध्यक्षहरू, नगर कार्यपालिका सदस्य, आर्थिक प्रशासन प्रमुख मनीष प्रसाद कलवार, कर्मचारी, सञ्चारकर्मी तथा सरोकारवाला व्यक्तिहरूको सहभागिता रहेको थियो । कार्यक्रममा प्रमुख प्रशासकीय अधिकृत नवराज अधिकारीले स्वागत मन्तव्य व्यक्त गरेका थिए ।
नगरपालिकाले सार्वजनिक गरेको आगामी वर्षको नीति तथा बजेटले कृषि उत्पादन वृद्धि, गुणस्तरीय शिक्षा, स्वास्थ्य सेवाको पहुँच विस्तार, खेलकुद विकास तथा पूर्वाधार निर्माणलाई प्राथमिकतामा राख्दै समग्र नगर विकासलाई गति दिने अपेक्षा गरिएको छ । 
प्रतिक्रिया दिनुहोस् !