कलैया (बारा), ६ असार । बारामा दुई दशकअघि भएको हत्या घटनामा संलग्न एक फरार आरोपीलाई प्रहरीले पक्राउ गरी अदालतको आदेशपछि पुर्पक्षका लागि कारागार पठाएको छ । जिल्ला प्रहरी कार्यालय बाराका अनुसार प्रसौनी गाउँपालिका–५ निवासी ४८ वर्षीय श्यामबाबु प्रसाद चौरसियालाई बारा जिल्ला अदालतको आदेशअनुसार थुनामा राखिएको हो ।
प्रहरीका अनुसार २०६२ साल असोज ३ गते तत्कालीन मोतिसर गाविस–९ (हाल कलैया उपमहानगरपालिका–१८ मोतिसर टोल) निवासी ४० वर्षीय सितलप्रसाद चौरसियाको हत्या भएको थियो । जग्गासम्बन्धी पुरानो विवाद र रिसइबीका कारण नारायणी उपक्षेत्रीय अस्पताल वीरगंजबाट ड्युटी सकेर घर फर्किरहेका बेला उनलाई तत्कालीन प्रसौनी गाविस–५ (हाल प्रसौनी गाउँपालिका–१) अन्तर्गत दुधौरा खोलाको बगरमा आक्रमण गरी हत्या गरिएको अनुसन्धानबाट खुलेको थियो ।
घटनाको अनुसन्धानका क्रममा श्यामबाबु प्रसाद चौरसियाले धारिलो हतियार प्रयोग गरी मृतकको घाँटी काटेर हत्या गरेको आरोप प्रहरीले लगाएको छ । घटनापछि फरार रहेका उनलाई प्रहरीले गत जेठ १३ गते पक्राउ गरेको थियो । पक्राउपश्चात आवश्यक अनुसन्धान तथा कानुनी प्रक्रिया पूरा गरी असार ५ गते बारा जिल्ला अदालतमा पेश गरिएकोमा अदालतले उनलाई पुर्पक्षका लागि थुनामा राख्न आदेश दिएको जिल्ला प्रहरी कार्यालय बाराका सूचना अधिकारी तथा प्रहरी नायव उपरीक्षक मिनबहादुर घलेले जानकारी दिए ।
लामो समयदेखि फरार रहेका आरोपी पक्राउ परेसँगै २१ वर्ष पुरानो हत्या प्रकरणले पुनः कानुनी प्रक्रियामा गति लिएको प्रहरीले जनाएको छ । 
प्रतिक्रिया दिनुहोस् !