वीरगंज (पर्सा), २६ जेठ । वीरगंजका चर्चित फुटबल खेलाडी तथा लोकप्रिय गायक अशोक प्रधानलाई ‘रिलिफ सोसाइटी अफ कमर्स पुरस्कार–२०८३’ प्रदान गरिएको छ । खेलकुद र संगीत क्षेत्रमार्फत वीरगञ्ज तथा नेपालको पहिचानलाई राष्ट्रिय र अन्तर्राष्ट्रिय स्तरसम्म स्थापित गर्न पुर्याएको योगदानको सम्मानस्वरूप उनलाई उक्त पुरस्कार प्रदान गरिएको हो ।
रिलिफ सोसाइटी अफ कमर्सको ३५औँ स्थापना दिवस तथा बुद्ध जयन्तीको अवसरमा प्रदान गरिने यो सम्मान विभिन्न कारणले निर्धारित समयमा वितरण हुन नसकेपछि आइतबार आयोजित विशेष समारोहमा प्रधानलाई सम्मान गरिएको थियो । वीरगंजस्थित रिलिफ सोसाइटी अफ कमर्सको कार्यालयमा सम्पन्न कार्यक्रममा संस्थाका अध्यक्ष योगेन्द्र प्रसाद यादव, निवर्तमान अध्यक्ष अशोक लाठ, गणेश लाठ, नारायण रुङ्टा तथा निरज अग्रवाललगायतको उपस्थितिमा सम्मान हस्तान्तरण गरिएको थियो ।
कार्यक्रममा बोल्दै समाजसेवी अशोक लाठले खेलकुद र संगीत दुवै क्षेत्रमा सक्रिय रहँदै समाजमा सकारात्मक सन्देश प्रवाह गर्न तथा वीरगंजको पहिचानलाई फराकिलो बनाउन अशोक प्रधानले उल्लेखनीय योगदान दिएको बताए। सोही योगदानको मूल्यांकन गर्दै उनलाई यस वर्षको सम्मान प्रदान गरिएको उनले स्पष्ट पारे । सम्मान ग्रहणपछि प्रतिक्रिया दिँदै अशोक प्रधानले रिलिफ सोसाइटी अफ कमर्सले समाजका विपन्न, असहाय तथा पछाडि परेका वर्गका लागि निरन्तर सामाजिक कार्य गर्दै आएको उल्लेख गरे । साथै विभिन्न क्षेत्रमा योगदान पुर्याएका व्यक्तित्वलाई सम्मान गरी थप प्रेरणा दिने संस्थाको प्रयास प्रशंसनीय रहेको बताए ।
‘विभिन्न क्षेत्रमा योगदान गर्ने व्यक्तिहरूलाई सम्मान गरेर प्रोत्साहन गर्ने कार्यले सकारात्मक ऊर्जा प्रदान गर्छ,’ उनले भने, ‘यो सम्मानले मलाई अझ बढी जिम्मेवार र उत्प्रेरित बनाएको छ ।’ प्रधानले आफूलाई सम्मानका लागि छनोट गरेकोमा संस्थाप्रति आभार व्यक्त गर्दै आगामी दिनमा पनि खेलकुद र संगीतमार्फत समाज तथा राष्ट्रका लागि योगदानलाई निरन्तरता दिने प्रतिबद्धता जनाए ।
रिलिफ सोसाइटी अफ कमर्सले हरेक वर्ष सामाजिक सेवा, शिक्षा, स्वास्थ्य, खेलकुद, कला, साहित्यलगायत विभिन्न क्षेत्रमा उल्लेखनीय योगदान पुर्याउने व्यक्तित्वहरूलाई सम्मान गर्दै आएको छ । 
प्रतिक्रिया दिनुहोस् !