वीरगंज (पर्सा), १५ जेठ । नेपाल रेडक्रस सोसाइटी केन्द्रीय कार्यालयको आयोजनामा तथा नेपाल रेडक्रस सोसाइटी पर्सा शाखाको समन्वयमा वीरगंजमा कृत्रिम घटनामा आधारित एकदिने ‘रेडक्रस इमर्जेन्सी क्लिनिक’ कार्यक्रम सम्पन्न गरिएको छ । देशका विभिन्न क्षेत्रमा हैजाजन्य (कोलेरा) संक्रमणको जोखिम बढ्दै गएको अवस्थालाई ध्यानमा राख्दै महामारीका बेला अपनाउनुपर्ने सतर्कता, प्राथमिक उपचार, सरसफाइ तथा आपत्कालीन व्यवस्थापनसम्बन्धी जनचेतना अभिवृद्धि गर्ने उद्देश्यसहित कार्यक्रम सञ्चालन गरिएको आयोजकले जनाएको छ ।
कार्यक्रममा कृत्रिम घटनाको अभ्यासमार्फत महामारी फैलिएको अवस्थामा रेडक्रसकर्मी, स्वास्थ्यकर्मी तथा स्वयंसेवकहरूले कसरी उद्धार, उपचार, समन्वय र जनचेतनामूलक गतिविधि सञ्चालन गर्छन् भन्ने विषयलाई व्यावहारिक रूपमा प्रस्तुत गरिएको थियो । अभ्यासका क्रममा संक्रमित बिरामीको उद्धार, प्राथमिक उपचार, सुरक्षित स्थानमा स्थानान्तरण, सरसफाइ व्यवस्थापन तथा समुदायस्तरमा सचेतना फैलाउने गतिविधिहरू प्रदर्शन गरिएको थियो ।
कार्यक्रममा सहभागी बृजकिशोर पटेलले महामारी तथा विपद्को समयमा यस्ता अभ्यासमूलक कार्यक्रम अत्यन्त प्रभावकारी हुने बताए । उनले रेडक्रस निरन्तर मानवीय सेवामा सक्रिय रहेको उल्लेख गर्दै आपत्कालीन परिस्थितिको सामना गर्न स्वयंसेवक र स्वास्थ्यकर्मीलाई सधैं तयारी अवस्थामा राख्नुपर्ने आवश्यकता औंल्याए ।
त्यस्तै कार्यक्रम संयोजक टीकाराज पौडेलले महामारी नियन्त्रणका लागि समुदायस्तरमै पूर्वतयारी र जनचेतना अपरिहार्य रहेको बताए । उनले सरसफाइ, स्वच्छ खानेपानी र स्वास्थ्य सुरक्षासम्बन्धी मापदण्ड कडाइका साथ पालना गर्नुपर्नेमा जोड दिए । कार्यक्रममा रेडक्रसका केन्द्रीय प्रतिनिधि, जिल्ला शाखाका पदाधिकारी, स्वास्थ्यकर्मी, स्वयंसेवक तथा विभिन्न सरोकारवालाको उल्लेखनीय सहभागिता रहेको थियो । आयोजकका अनुसार यस्ता अभ्यासमूलक कार्यक्रमले महामारी तथा विपद् व्यवस्थापनमा स्थानीय तहको तयारीलाई अझ प्रभावकारी र सुदृढ बनाउन महत्वपूर्ण सहयोग पुग्ने अपेक्षा गरिएको छ । 
प्रतिक्रिया दिनुहोस् !