वीरगंज (पर्सा), २६ वैशाख । वीरगंज महानगरपालिका वडा नं. १० को आयोजनामा चौथो संस्करणको वडा स्तरीय क्रिकेट प्रतियोगिता शनिबारदेखि औपचारिक रूपमा सुरु भएको छ । प्रतियोगिताको उद्घाटन पर्सा क्षेत्र नं. २ का प्रतिनिधि सभा सदस्य सुशिल साह कानु ले गरेका हुन् ।
युवाहरूलाई खेलकुदतर्फ आकर्षित गर्दै अनुशासन, सद्भाव र सहकार्यको भावना विकास गर्ने उद्देश्यले प्रतियोगिता आयोजना गरिएको आयोजकले जनाएको छ । उद्घाटन समारोहलाई सम्बोधन गर्दै सांसद कानुले खेलकुदले युवालाई सकारात्मक दिशातर्फ प्रेरित गर्ने उल्लेख गरे । उनले स्थानीय तहबाट यस्ता प्रतियोगितालाई निरन्तरता दिनुपर्ने आवश्यकता औंल्याउँदै खेलकुदमार्फत समाजमा भाइचारा, अनुशासन र सामाजिक एकता मजबुत बन्ने धारणा व्यक्त गरे ।
कार्यक्रम वडा नं. १० का कार्यवाहक वडाध्यक्ष सन्तोष जैसिको अध्यक्षतामा सम्पन्न भएको थियो । कार्यक्रममा उद्योगपति अशोक बैध, प्याब्सन वीरगंज महानगर अध्यक्ष राहुल श्रीवास्तव, रबि श्रीवास्तव, घडिअर्वा स्पोट्र्स क्लबका अध्यक्ष सन्तोष कानु, वडा सचिव पवन प्रधानलगायत विभिन्न क्षेत्रका व्यक्तित्वहरूको उपस्थिति रहेको थियो ।
उद्घाटन समारोहकै अवसरमा वडा अन्तर्गत रहेका ८ वटा विद्यालयको सहभागितामा मार्चपास प्रतियोगिता पनि आयोजना गरिएको थियो । प्रतियोगितामा लिटल एन्जल स्कुल प्रथम, माउन्ट मकालु स्कुल दोस्रो तथा श्री रामचरण पन्नालाल माध्यमिक विद्यालय तेस्रो भएका छन् । उत्कृष्ट प्रदर्शन गर्ने विद्यालयहरूलाई आयोजकले बधाई तथा शुभकामना व्यक्त गरेको छ ।
कार्यक्रमको सञ्चालन पत्रकार क्रान्ति साहले गरेका थिए । आयोजकका अनुसार प्रतियोगितामा विभिन्न टिमहरूको सहभागिता रहनेछ भने आगामी केही दिनसम्म प्रतिस्पर्धात्मक खेलहरू सञ्चालन गरिनेछन् । यस प्रतियोगिताले स्थानीय स्तरमा क्रिकेट खेलको विकास र युवा प्रतिभा पहिचानमा महत्वपूर्ण योगदान पुग्ने विश्वास गरिएको छ । 
प्रतिक्रिया दिनुहोस् !