वीरगंज (पर्सा), २१ वैशाख । वीरगंज महानगरपालिकाको आयोजनामा वीरगंजस्थित घडिअर्वा पोखरी कभर्डहलमा ‘चौथो नगर राष्ट्रपति रनिङ सिल्ड तेक्वान्दो छनोट प्रतियोगिता’ सम्पन्न भएको छ । कार्यक्रमको अध्यक्षता गणेशमान श्रेष्ठले गरेका थिए भने प्रमुख अतिथिका रूपमा पर्सा जिल्ला तेक्वान्दो सङ्घका अध्यक्ष दीपक साह कानु उपस्थित थिए ।
प्रतियोगितामा करिब ३०० जना खेलाडी तथा खेलप्रेमीहरूको उल्लेखनीय सहभागिता रहेको आयोजकले जनाएको छ । विभिन्न तौल समूह र पुम्से (काटा) विधामा प्रतिस्पर्धा गराइएको यस छनोट प्रतियोगितामा खेलाडीहरूले उत्कृष्ट प्रदर्शन गरेका थिए ।
पुरुषतर्फ ४५ केजी तौल समूहमा गौतम कुमार प्रजापति प्रथम भएका छन् । त्यसै समूहमा जेनिस खड्का द्वितीय तथा मोहित लिम्बू र प्रणिल थापा तृतीय स्थानमा रहेका छन् । ४८ केजी तौल समूहमा आशिष कुमार सराफले प्रथम स्थान हासिल गर्दा विकी कुमार यादव द्वितीय भए भने सुलभ थारु र सक्षम चौरसिया तृतीय बने ।
यस्तै ५१ केजी तौल समूहमा शिवजी कुमार पटेल प्रथम घोषित भए । यस समूहमा अब्राहम भुजु द्वितीय र जानिलाल जाफर तथा आयुस चौधरी तृतीय स्थानमा रहे । ५५ केजी समूहमा स्वयममान रन्जितकारले प्रथम स्थान प्राप्त गरे भने प्रिन्स कुमार द्वितीय भए । अन्य प्रतिस्पर्धामा शिवम कुमार प्रथम र शेख रहमान हुसेन द्वितीय भएका छन् ।
पुम्से (काटा) विधातर्फ पनि खेलाडीहरूको उत्कृष्ट प्रदर्शन देखिएको थियो । एकल पुरुष पुम्सेमा हबिबुल्लाह मियाँ प्रथम भए भने आगमन ठकुरी द्वितीय र साजन पटेल तथा आयुस ठकुरी तृतीय स्थानमा रहे । महिलातर्फको एकल पुम्सेमा रोशनी मोक्तानले प्रथम स्थान हासिल गरेकी छन् ।
प्रतियोगिताको निष्पक्ष सञ्चालनका लागि जुरीको जिम्मेवारी महमद सकिल र गणेशमान श्रेष्ठले सम्हालेका थिए । रेफ्रीको भूमिकामा राजेन्द्र शाही, महमद मन्सुर हवारी, विक्रान्त डङ्गोल, सोएब अख्तर र दिपेश मानन्धरलगायत सक्रिय रहेका थिए ।
समापन समारोहमा सभापति गणेशमान श्रेष्ठले उत्कृष्ट प्रदर्शन गर्ने खेलाडीहरूलाई आगामी प्रदेशस्तरीय तेक्वान्दो प्रतियोगितामा सहभागी गराइने जानकारी दिएका छन् । 
प्रतिक्रिया दिनुहोस् !