वीरगंज (पर्सा), १४ वैशाख । पर्साको सखुवा प्रसौनी गाउँपालिका–५ महुवनस्थित पारसनाथ महादेव महुवन मठअन्तर्गत गुठी संस्थानको अतिक्रमित करिब ५ बिघा भन्दा बढि जमिन आइतबार डोजर प्रयोग गरी खाली गराइएको छ । मधेश प्रदेशको गृह, सञ्चार तथा कानुन मन्त्रालयको निर्देशन तथा गाउँपालिकाको सक्रियतामा बिहानैदेखि अभियान सञ्चालन गरिएको हो ।
मठअन्तर्गत पर्ने कित्ता नम्बर २७६ को करिब ५ बिघा ६ कठ्ठा क्षेत्रफल रहेको पोखरीको डिलसहित गुठीको जमिनमा अवैध रूपमा घर, टहरा र अन्य संरचना निर्माण गरी अतिक्रमण गरिएको थियो । गृहमन्त्री फकिरा महतोको प्रत्यक्ष निर्देशनमा सात वटा डोजर प्रयोग गरी अतिक्रमण हटाइएको गाउँपालिका अध्यक्ष जसवन्त यादवले जानकारी दिए । उनका अनुसार अतिक्रमण गरेर बनाइएका करिब ३८० घरटहरा भत्काइएका छन् ।
गुठी संस्थानले यसअघि वैशाख १० गते सूचना जारी गर्दै श्री पारसनाथ महादेव महुवन मठ गुठीअन्तर्गत पर्ने साविक महुवन वडा नं. ५ को किता नं. २७६ मा रहेको पोखरी डिलसहितको ५ विघा १७ धुर क्षेत्रफलमा अनधिकृत रूपमा घर, टहरा लगायतका संरचना निर्माण गरी अतिक्रमण गरिएको उल्लेख गर्दै स्वेच्छाले हटाउन आग्रह गरेको थियो ।
तर अतिक्रमणकारीहरूले संरचना नहटाएपछि आइतबार डोजर लगाएर खाली गराइएको गुठी संस्थान वीरगंजकी प्रमुख उर्मिला अर्चायले जानकारी दिइन् । लामो प्रयासपछि पर्सा जिल्लाकै ऐतिहासिक धरोहरका रूपमा रहेको पारसनाथ पोखरी क्षेत्रलाई अतिक्रमणमुक्त गराउन सफल भएको उनले बताइन् ।
२०८१ माघ ४ गते गाउँपालिकाले पनि सूचना जारी गर्दै तीन दिनभित्र अतिक्रमण हटाउन आग्रह गरेको थियो, अन्यथा कानुनी प्रक्रिया अघि बढाउने चेतावनी पनि दिइएको थियो । अन्ततः मन्त्रीस्तरबाट निर्देशन आएपछि सुरक्षाकर्मीको सहयोगमा आइतबारदेखि कडाइका साथ अभियान अघि बढाइएको अध्यक्ष यादवले बताए । यस्तै, महुवन क्षेत्रमा गुठी संस्थानकै थप करिब २९ बिघा अतिक्रमित जमिनसमेत चरणबद्ध रूपमा खाली गराउने प्रक्रिया सुरु गरिएको जनाइएको छ । 
प्रतिक्रिया दिनुहोस् !