वीरगंज (पर्सा), ९ वैशाख । पर्सा जिल्लाको ग्रामीण क्षेत्रमा पछिल्लो एक सातादेखि वायु तथा वातावरणीय प्रदूषण अत्यधिक बढ्दै जाँदा स्थानीय जनजीवन कष्टकर बन्दै गएको छ । चितवन राष्ट्रिय निकुञ्ज आसपासका वन क्षेत्रमा लागेको डढेलोबाट फैलिएको धुवाँले वातावरण धुम्म बनाउँदा प्रदूषण झन् तीव्र भएको हो ।
स्थानीयका अनुसार गहुँबाली भित्र्याउने क्रममा उड्ने धुलो, गहुँको छवाली जलाउँदा निस्कने धुवाँ, र लामो समयदेखि वर्षा नहुनुका कारण सडकबाट उड्ने धुलोले अवस्था थप बिगारेको छ । दिनभरि नै धुलो र धुवाँको मिश्रणले वातावरण ढाकिँदा दैनिक क्रियाकलापसमेत प्रभावित भएका छन् ।
जगरनाथपुर गाउँपालिका–४ का स्थानीय दिनदयाल दास थारुले बिहानैदेखि वातावरण कुहिरोजस्तै धुम्म हुने, आँखा पोल्ने, आँसु आउने र रातो हुने समस्या बढेको बताए। श्वास–प्रश्वासमा समेत समस्या देखिन थालेको र अत्यधिक प्रदूषणका कारण घरभित्र बस्नसमेत कठिन भएको उनको अनुभव छ । यो समस्या ठोरी गाउँपालिका, जिराभवानी गाउँपालिका, पटेर्वासुगौली गाउँपालिका, सखुवाप्रसौनी गाउँपालिका, पर्सागढी नगरपालिका तथा वीरगंज महानगरपालिकाका केही वडासम्म फैलिएको छ ।
स्वास्थ्यकर्मीहरूले वायु प्रदूषणले गम्भीर असर पार्न थालेको चेतावनी दिएका छन् । पटेर्वासुगौली गाउँपालिकाका स्वास्थ्य शाखा प्रमुख भुजेन्द्र यादवका अनुसार मुटु, फोक्सो तथा श्वास–प्रश्वाससम्बन्धी दीर्घरोगीहरूका लागि अहिलेको अवस्था अत्यन्त जोखिमपूर्ण बनेको छ । प्रदूषित वातावरणका कारण आँखामा संक्रमणको खतरा समेत बढेको उनले बताए । त्यस्तै, ठोरी गाउँपालिकाका स्वास्थ्य शाखा प्रमुख रमेशराज थिङ्गले आवश्यक सावधानी अपनाउन आग्रह गरेका छन् ।
अत्यावश्यक बाहेक बाहिर ननिस्किन, बाहिर जाँदा मास्क र चस्मा प्रयोग गर्न तथा सवारी चलाउँदा हेल्मेट लगाउन उनले सुझाव दिएका छन् । स्वास्थ्य समस्या देखिएमा नजिकको स्वास्थ्य संस्थामा तुरुन्त जाँच गराउन पनि आग्रह गरिएको छ । बढ्दो प्रदूषण नियन्त्रणका लागि डढेलो व्यवस्थापन, धुलो नियन्त्रण र जनचेतना अभिवृद्धिमा सम्बन्धित निकायले तत्काल प्रभावकारी कदम चाल्नुपर्ने देखिएको छ ।
प्रतिक्रिया दिनुहोस् !