वीरगंज (पर्सा), ६ वैशाख । लामो समयदेखि अन्योलमा रहेको त्रिभुवन राजपथअन्तर्गत वीरगंजको मुख्य सडक विस्तार कार्य अन्ततः आइतबार बिहानबाट औपचारिक रूपमा सुरु भएको छ । जिल्ला प्रशासन कार्यालय पर्साको नेतृत्वमा बिहान सबेरैदेखि सडक सीमाभित्र परेका अतिक्रमित संरचनाहरू हटाउने अभियान अघि बढाइएको हो । प्रशासनले शनिबार साँझ नै सूचना जारी गर्दै आइतबार बिहान साढे ४ बजेसम्म सडकको दायाँ–बायाँ २५/२५ मिटर क्षेत्र खाली गर्न निर्देशन दिएको थियो । सोही निर्देशनअनुसार आइतबार बिहानैदेखि डोजर र एक्साभेटर प्रयोग गरी घर, टहरा तथा अन्य संरचनाहरू हटाउन थालिएको छ ।
पर्साका प्रमुख जिल्ला अधिकारी भोलाप्रसाद दाहालका अनुसार नेपाल–भारत मितेरी पुलदेखि गण्डक चोकसम्मको सडक खण्डमा केन्द्ररेखाबाट दुवैतर्फ २५ मिटरभित्र पर्ने सम्पूर्ण संरचना हटाइँदैछ । सडक विस्तारलाई गति दिन भन्सार क्षेत्र, घण्टाघर, मुर्ली र चिनी मिल आसपासका स्थानहरूमा एकैसाथ काम अगाडि बढाइएको छ । सडक डिभिजन कार्यालय हेटौँडाका अनुसार विस्तार कार्यलाई प्रभावकारी बनाउन पाँच फरक स्थानबाट समानान्तर रूपमा काम सुरु गरिएको छ । डोजर र एक्साभेटरसहित करिब एक दर्जन उपकरण परिचालनमा रहेका छन् भने सुरक्षाको दृष्टिले ठूलो संख्यामा प्रहरी परिचालन गरिएको छ ।
वीरगंज महानगरपालिका, सडक डिभिजन कार्यालय, स्थानीय प्रशासन र सुरक्षानिकायबीच समन्वय गरी अतिक्रमण हटाउने काम भइरहेको छ । प्रशासनले चरणबद्ध रूपमा संरचना हटाउँदै सडक विस्तार अभियानलाई निरन्तरता दिने जनाएको छ । यसअघि करिब १३ वर्षदेखि रोकिएको यो योजना सर्वोच्च अदालतको फैसलापछि कार्यान्वयनमा आएको हो । २०८१ फागुन २८ गते सर्वोच्च अदालतले सडक विस्तारसम्बन्धी मुद्दामा सरकारको पक्षमा फैसला गर्दै जग्गाधनीहरूले दायर गरेको रिट खारेज गरेपछि योजना अघि बढ्ने बाटो खुलेको हो ।
रिट निवेदकहरूले मुआब्जा तथा वैकल्पिक व्यवस्थाको माग गर्दै मुद्दा दायर गरेका थिए । उनीहरूले जग्गा प्राप्ति ऐन, २०३४ र सार्वजनिक सडक ऐन, २०३१ अनुसार प्रक्रिया नअपनाइएको दाबी गरे पनि अदालतले उक्त दाबी अस्वीकार गरेको छ । अब अतिक्रमण हटाउने कार्यसँगै वीरगंजको मुख्य सडकलाई व्यवस्थित, फराकिलो र सुरक्षित बनाउने लक्ष्यका साथ विस्तार अभियानलाई तीव्रता दिइएको छ ।
वीरगंज सडक विस्तारमा जेन जि यूथ फोर्स पर्साको समर्थन
वीरगंजको मुख्य सडक फराकिलो बनाउने अभियानप्रति जेन जि यूथ फोर्स पर्साले औपचारिक समर्थन जनाएको छ। संस्थाले शनिबार जारी गरेको प्रेस विज्ञप्तिमार्फत उक्त कार्यप्रति पूर्ण साथ रहने स्पष्ट पारेको हो । शहरलाई व्यवस्थित, आकर्षक र सुरक्षित बनाउने उद्देश्यले चालिएको यो कदम सकारात्मक रहेको संस्थाको धारणा छ।
विज्ञप्तिमा २५/२५ मिटरको मापदण्डअनुसार गरिने सडक विस्तारले दीर्घकालीन रूपमा शहरी व्यवस्थापनमा उल्लेखनीय योगदान पुग्ने विश्वास व्यक्त गरिएको छ । यससँगै, अभियानलाई पारदर्शी, निष्पक्ष तथा जनहितमुखी तरिकाले अगाडि बढाउन सम्बन्धित निकायलाई ध्यानाकर्षण गराइएको छ । जेन जि यूथ फोर्स पर्साले सम्पूर्ण नगरवासीलाई समेत यस अभियानमा सक्रिय सहयोग गर्न आह्वान गरेको छ । वीरगंजलाई अझ व्यवस्थित र उत्कृष्ट शहरका रूपमा विकास गर्न सबै पक्षको सहकार्य अपरिहार्य रहेको संस्थाका संयोजक विशेष साहले बताएका छन् ।
प्रतिक्रिया दिनुहोस् !