वीरगंज (पर्सा), ४ वैशाख । मधेश प्रदेशमा भारत सरकारको विकास सहयोग उल्लेखनीय रूपमा विस्तार हुँदै गएको छ । भारतीय पक्षका अनुसार हाल प्रदेशभरि कुल ८९ वटा परियोजना विभिन्न क्षेत्रमा सञ्चालनमा रहेका छन्, जसमा धनुषा जिल्लामा मात्रै २१ वटा परियोजना केन्द्रित छन् । भारतीय महावाणिज्य दूतावास वीरगंजका महावाणिज्य दूत देवी सहाय मीनाले धनुषाको बटेश्वर गाउँपालिका–३ स्थित श्री जनशक्ति माध्यमिक विद्यालयको भवन शिलान्यास कार्यक्रममा बोल्दै यस्तो जानकारी दिएका हुन् ।
उनका अनुसार मधेश प्रदेशमा स्वीकृत ८९ परियोजनामध्ये ६१ वटा सम्पन्न भइसकेका छन् भने २८ वटा निर्माणाधीन अवस्थामा रहेका छन् । क्षेत्रगत रूपमा हेर्दा शिक्षा क्षेत्रमा सबैभन्दा धेरै ५४ परियोजना कार्यान्वयनमा छन् । त्यसपछि सडक तथा पुलमा ८, स्वास्थ्य क्षेत्रमा ७, विद्युतीकरणमा ५, संस्कृति क्षेत्रमा ३, सिँचाइमा २ र नदी तटबन्धसम्बन्धी १ परियोजना रहेका छन् । बाँकी ९ परियोजना अन्य क्षेत्रमा फैलिएका छन् ।
धनुषामा सञ्चालित २१ परियोजनामध्ये १३ वटा सम्पन्न भइसकेका छन् भने ८ वटा निर्माणको चरणमा छन् । यसले जिल्लालाई विकास सहयोगको मुख्य केन्द्रका रूपमा देखाएको छ । भारत सरकारले मधेश प्रदेशमा हालसम्म २३२ एम्बुलेन्स र ४० वटा स्कुल बस उपलब्ध गराइसकेको जनाएको छ । तीमध्ये धनुषाले मात्र ४६ एम्बुलेन्स र ११ स्कुल बस प्राप्त गरेको तथ्यांक प्रस्तुत गरिएको छ । कार्यक्रममा बोल्दै महावाणिज्य दूत मीनाले नेपाल–भारत विकास साझेदारी बहुआयामिक र दीर्घकालीन रहेको उल्लेख गरे । उनका अनुसार यस्ता परियोजनाले शिक्षा, स्वास्थ्य र पूर्वाधार क्षेत्रमा प्रत्यक्ष प्रभाव पार्दै स्थानीय स्तरमा जीवनस्तर सुधार गर्न मद्दत गरिरहेका छन् ।
स्थानीय जनप्रतिनिधिहरूले पनि भारतीय सहयोगले विशेषगरी ग्रामीण क्षेत्रमा सेवा पहुँच विस्तार भएको बताएका छन् । विद्यालय भवन निर्माण, एम्बुलेन्स तथा स्कुल बस उपलब्धताजस्ता कार्यक्रमले शिक्षा र स्वास्थ्य सेवामा सकारात्मक परिवर्तन ल्याएको उनीहरूको भनाइ छ । समग्रमा, यी परियोजनाहरूले मधेश प्रदेशको विकासमा मात्र नभई नेपाल–भारतबीचको जनस्तरको सम्बन्धलाई समेत थप सुदृढ बनाइरहेको देखिन्छ ।
प्रतिक्रिया दिनुहोस् !