वीरगंज (पर्सा), २८ चैत । नयाँ बर्ष २०८३ को शुभसंध्यामा नयाँ बर्षको आगमनलाई स्वागत गर्दै अभिभावक संघ वीरगंजले शनिवार विहान रक्तदान कार्यक्रम सम्पन्न गरेको छ ।
वीरगंज मुर्ली चौकमा आयोजित रक्तदान कार्यक्रममा पाँच जना महिला सहित ५१ जनाले रक्त दान गरेको, अभिभावक संघ वीरगंजका अध्यक्ष संदिपकुमार साहले जानकारी दिएका छन् । कार्यक्रममा रक्त संचार केन्द्र वीरगंजका इन्चार्ज सौरभ पाण्डेको नेतृत्वमा रहेको प्रविधिक टोलीले सहयोग पुर्याएको थियो ।
पछिल्लो पटक वीरगंजमा विरामीलाई आवस्यक रगतको अभाव खटकिंदै गएको छ । रक्तदान कम हुने तर रगतको माग भने बढि हुने गरेका कारण रगत अभाव भएको हो ।
यसैगरि वीरगंज महानगरपालिका वडा नं. ४ विर्ता बजारमा आयोजित निःशुल्क स्वास्थ्य शिविर सम्पन्न भएको छ । स्वास्थ्य सेतु नेपालद्वारा आयोजित उक्त शिविरमा १९८ जनाले निःशुल्क स्वास्थ्य परीक्षण सेवा लिएका छन् ।
संस्थाका अध्यक्ष अजहर आलमको अध्यक्षतामा सम्पन्न शिविरमा निःशुल्क स्वास्थ्य परीक्षण, रक्त परीक्षण तथा औषधि वितरण सेवा प्रदान गरिएको थियो । शिविरमा चिकित्सा अधिकारीहरू डा. जफर आलम, डा. मोस्तकिम मन्सुर, डा. नौशाद अली, डा. नविन सर्राफ र डा. सुमित चौरसिया लगायतको सहभागिता रहेको थियो ।
आयोजकका अनुसार यस्ता स्वास्थ्य शिविरले स्थानीय बासिन्दालाई सहज रूपमा स्वास्थ्य सेवा उपलब्ध गराउनुका साथै स्वास्थ्य सचेतना अभिवृद्धि गर्न महत्वपूर्ण योगदान पुर्याउने विश्वास गरिएको छ । 
प्रतिक्रिया दिनुहोस् !