वीरगंज (पर्सा), २८ चैत । गहुँबाली भित्र्याउने क्रम अन्तिम चरणमा पुगेसँगै खेतमा बाँकी रहेका छवाली र ठुट्टा जलाउने प्रचलनले ग्रामीण क्षेत्रमा आगलागीको जोखिम तीव्र बनाएको छ । हाल करिब ८० प्रतिशतभन्दा बढी गहुँ कटानी भइसकेको छ भने बाँकी बाली भित्र्याउने काम जारी छ । कटानी सम्पन्न भएका खेतहरूमा दैनिक रूपमा छवाली जलाउने क्रम बढेको छ ।
चर्को घाम र पछुवा हावाका कारण सानो आगोसमेत नियन्त्रणबाहिर गई फैलिने गरेको छ, जसले नजिकका बस्ती र अन्य बालीमा क्षति पुर्याउने खतरा बढाएको छ । हालै पर्सागढी नगरपालिका–५ मा छवाली जलाउने क्रममा आगो अनियन्त्रित भई भित्र्याउन बाँकी रहेको गहुँबालीमै फैलिएको थियो । उक्त आगो स्थानीय तहका बारुणयन्त्र प्रयोग गरी नियन्त्रणमा लिइएपनि यस घटनाले जोखिमको गम्भीरता उजागर गरेको छ ।
हरेक वर्ष यस्तै लापरवाहीका कारण बिघौँ जमिनमा लगाइएको गहुँबाली जलेर नष्ट हुने गरेको तथ्यले समस्या झन् गम्भीर बनेको देखिन्छ । जिल्ला विपद् व्यवस्थापन समिति पर्साले आगलागी नियन्त्रणका लागि पूर्वतयारी तीव्र बनाएको जनाएको छ । समितिका प्रतिनिधिका अनुसार जिल्लाका सबै पालिकाका जनप्रतिनिधि र कर्मचारीसँग समन्वय गर्दै सचेतना तथा प्रशिक्षण कार्यक्रम सञ्चालन गर्ने तयारी भइरहेको छ ।
किसानहरू भने छवाली र ठुट्टा सुकेको अवस्थामा जलाउन सजिलो हुने तथा वर्षा सुरु भएपछि व्यवस्थापन कठिन हुने भएकाले अहिले आगो लगाउने गरेको बताउँछन् । साथै, बाँकी भुसले धान रोपाइँमा असर पार्ने विश्वासका कारण पनि यस्तो अभ्यास जारी रहेको उनीहरूको भनाइ छ । तर कृषि तथा वातावरणविद्हरूले भने यस्तो अभ्यासले दीर्घकालीन क्षति पुर्याउने चेतावनी दिएका छन् ।
उनीहरूले गहुँको छवाली संकलन गरी भुस बनाएर पशु आहारका रूपमा प्रयोग गर्न सकिने सुझाव दिएका छन्, जसले आगलागीको जोखिम घटाउनुका साथै पशुपालन प्रवद्र्धनमा समेत सहयोग पुग्ने बताइएको छ । छवाली जलाउने परम्परागत अभ्यासले तत्कालीन सहजता दिए पनि त्यसले निम्त्याउने आगलागी जोखिम र आर्थिक क्षति न्यूनीकरणका लागि वैकल्पिक उपाय अपनाउनु आवश्यक देखिएको छ । 
प्रतिक्रिया दिनुहोस् !