काठमाडौँ, २६ चैत । श्रम, रोजगार तथा सामाजिक सुरक्षा मन्त्री दीपककुमार साह १३ दिनमै पदमुक्त भएका छन् । श्रीमतीलाई स्वास्थ्य बिमा बोर्डको सदस्य बनाउने प्रयास र विवादास्पद अभिव्यक्तिका कारण उनलाई पदबाट हटाइएको हो । बालेन्द्र शाह नेतृत्वको सरकारमा चैत १३ गते मन्त्री नियुक्त भएका साहलाई राष्ट्रिय स्वतन्त्र पार्टी (रास्वपा)ले ‘राइट टु रिकल’ व्यवस्था प्रयोग गर्दै फिर्ता बोलाएपछि प्रधानमन्त्री शाहले पदमुक्त गरेका हुन् ।
मन्त्री साहले आफ्नी श्रीमती जुनु श्रेष्ठलाई स्वास्थ्य बिमा बोर्डको सदस्य बनाउन लबिङ गरेका थिए । लामो समयदेखि निष्क्रिय रहेको बोर्डमा उनलाई पुनः सक्रिय गराउन खोजिएको विषयले विवाद उत्पन्न गरेको थियो । उक्त नियुक्तिमा निशा मेहता नेतृत्वको स्वास्थ्य तथा जनसंख्या मन्त्रालयबाट समेत सहमति दिइएको बताइएको छ ।
यद्यपि, सतहमा देखिएको विवाद श्रीमती नियुक्तिको भए पनि मन्त्री साहको सार्वजनिक अभिव्यक्तिप्रति समेत असन्तुष्टि बढेको थियो । १०औँ राष्ट्रिय बिमा दिवसको कार्यक्रममा उनले सरकार र कर्मचारीतन्त्रप्रति कडा टिप्पणी गर्दै स्वास्थ्य बिमा कार्यक्रमको वित्तीय अवस्था कमजोर रहेको र मन्त्रालयस्तरमै हस्तक्षेप हुने गरेको बताएका थिए । उनको उक्त अभिव्यक्तिलाई आफ्नो कार्यक्षेत्रभन्दा बाहिरको र असंयमित मानिएको थियो ।
रास्वपाको अनुशासन आयोगले मन्त्री साहमाथि पदको दुरुपयोगसम्बन्धी विषयमा अध्ययन गरी चैत २५ गते कारबाहीका लागि सिफारिस गरेको थियो । पार्टी विधानअनुसार सभापतिलाई मर्यादा र अनुशासन कायम राख्ने जिम्मेवारी रहेको तथा आवश्यक परे ‘राइट टु रिकल’ प्रयोग गर्न सकिने व्यवस्था छ । सोही आधारमा पार्टी सभापति रवि लामिछानेले प्रधानमन्त्रीलाई पत्र लेख्दै मन्त्री साहलाई पदबाट हटाउन सिफारिस गरेका थिए । साह महोत्तरी–२ बाट निर्वाचित प्रतिनिधिसभा सदस्य हुन् ।
यसैबीच, प्रधानमन्त्री शाहले स्वास्थ्य तथा जनसंख्या मन्त्री निशा मेहतालाई पनि सचेत गराएका छन् । रास्वपा सभापति लामिछानेको सिफारिसका आधारमा मन्त्री मेहतालाई जिम्मेवारीप्रति गम्भीरता नदेखाएको भन्दै चेतावनी दिइएको प्रधानमन्त्रीको सचिवालयले जनाएको छ । मन्त्री मेहता पनि चैत १३ गते नै मन्त्रीमा नियुक्त भएकी थिइन् । 
प्रतिक्रिया दिनुहोस् !