वीरगंज (पर्सा), २६ चैत । पर्साका पत्रकारहरुले सरकारी निकायको कुनैपनि गतिविधि प्रकाशन नगर्न सुझाव दिएका छन् । नेपाल सरकारले सरकारी सूचना सरकारी सञ्चारमाध्यममा मात्र प्रकाशन तथा प्रसारण गर्न गरेको निर्णयको विरुद्धमा पत्रकार महासंघ पर्सा शाखामा आयोजित छलफल तथा सल्लाह सुझाव संकलन कार्यक्रममा सहभागी पत्रकारहरुले सो सल्लाह दिएका हुन् ।
छलफलमा सहभागी पत्रकारहरुले सरकारलाई सूचना प्रकाशन गर्न सरकारी मिडिया चाहिने तर समाचारको लागि निजी मिडिया चाहिने ? भन्दै सरकारको कुनै किसिमको गतिविधिलाई निजी मिडियामार्फत प्रकाशन प्रशारणमा रोक लगाउनुपर्ने सुझाव दिएका थिए । निजी मिडिया संचालनको लागि सरकारले नै अधिकार दिएको र अहिले आएर निजी मिडियामाथि सरकारले नै अँकुश लगाउन खोजेको आरोप लगाउँदै सरकारी मिडियालाई पाल्ने मात्रै सरकारले कार्य गरि रहेको बताएका थिए ।
सूचना प्रकाशन प्रशारणमा कहिँ कतै कमजोरी भएको होला, तर त्यसको कारण सम्पूर्ण निजी मिडियाको आयश्रोत नै बन्द गर्ने सरकारको निर्णय गलत रहेको भन्दै अब ज्ञापन पत्र, कालोपट्टि बाँधेर विरोध गर्नुभन्दा पनि निजी पत्रपत्रिका बन्द नै गरेर विरोध गर्नुपर्ने सुझाव दिएका थिए ।
सरकारको उक्त निर्णयले निजी सञ्चारमाध्यम र त्यहाँ कार्यरत पत्रकारहरू अन्यायमा परेको बताउँदै सहभागी पत्रकारहरुले सरकारी विज्ञापनलाई व्यवस्थित र नियमन गर्नुपर्नेमा उल्टै निजी सञ्चारमाध्यमलाई नै वञ्चित गर्ने प्रयास भएको भन्दै आपत्ति जनाएका थिए । यस्तो निर्णय कार्यान्वयन भए धेरै निजी सञ्चारमाध्यम बन्द हुने अवस्था आउन सक्ने र ठूलो संख्यामा पत्रकारहरूको रोजगारी समेत गुम्न सक्ने भन्दै सरकारले उक्त निर्णय तत्काल फिर्ता लिनुपर्ने माग गरेका थिए ।
सरकारले संघीय मन्त्रालय, आयोग, सचिवालय, प्रदेश तथा स्थानीय तहलाई सरकारी सञ्चारमाध्यममा मात्र सूचना प्रकाशन गर्न निर्देशन दिएको परिपत्रको विरोध गर्दै उक्त निर्णय तत्काल फिर्ता गराउन दबाब सिर्जना गर्ने उद्देश्यले आयोजित छलफल तथा सुझाव संकलन कार्यक्रममा पर्सा जिल्लाबाट प्रकाशित तथा प्रसारित दैनिक, साप्ताहिक र अनलाइन सञ्चारमाध्यमका प्रकाशक तथा सम्पादकहरूको सहभागिता रहेको थियो ।
नेपाल पत्रकार महासंघ पर्साका अध्यक्ष ओमप्रकाश खनालको अध्यक्षतामा सम्पन्न कार्यक्रममा महासंघ मधेश प्रदेशका सचिव दिपक गौतम, प्रेस चौतारीका केन्द्रीय सदस्य विजय भण्डारी, प्रेस सेन्टर मधेश प्रदेशका अध्यक्ष निरज पिठाकोटे मगर, समाजवादी प्रेस संगठन मधेश प्रदेशका अध्यक्ष मनोज पटेल, पर्सा जिल्ला अध्यक्ष शम्भु कुमार सुमन लगायतको उपस्थिति रहेको थियो । कार्यक्रमको संचालन पत्रकार महासंघ पर्साका सचिव विजय चौहानले गरेका थिए । 
प्रतिक्रिया दिनुहोस् !