एमाले पर्साको भेला फितलोः न्यून उपस्थितिले घट्दो सक्रियताको संकेत, ओली रिहाइको माग

वीरगंज (पर्सा), २५ चैत । नेपाल कम्युनिष्ट पार्टी (एमाले) पर्साद्वारा आयोजना गरिएको जिल्ला स्तरीय बृहत् कार्यकर्ता भेला बुधबार वीरगंजमा सम्पन्न भएको छ । तर अपेक्षा गरिएभन्दा निकै कम उपस्थिति देखिएपछि पार्टीभित्र सक्रियता र उत्साह घट्दै गएको संकेत नेताहरूले गरेका छन् ।

वीरगंजको नगर सभा गृहमा सम्पन्न उक्त भेलामा केन्द्रीय सदस्य, प्रदेश कमिटीका पदाधिकारी, जिल्ला कमिटी, महानगर तथा पालिका तहका नेता–कार्यकर्तालाई अनिवार्य रूपमा सहभागी हुन निर्देशन दिइएको थियो । तर करिब एक सय जनाको मात्रै उपस्थितिले कार्यक्रम अपेक्षाअनुसार प्रभावकारी बन्न नसकेको बताइएको छ ।

पार्टी संरचनामा तीन जना केन्द्रीय सदस्य, एक दर्जनभन्दा बढी प्रदेश कमिटी सदस्य, १३५ सदस्यीय जिल्ला कमिटी, १०१ सदस्यीय वीरगंज महानगर कमिटी, १३ वटा पालिका कमिटी र २३ वटा जनवर्गीय संगठन सक्रिय भए पनि भेलामा न्यून सहभागिता देखिएको एक नेताले जानकारी दिए । अध्यक्ष तथा पूर्वप्रधानमन्त्री केपी शर्मा ओलीको पक्राउविरुद्ध केन्द्रीय सर्कुलरअनुसार आयोजना गरिएको कार्यक्रममा पूर्वमन्त्री प्रदीप यादव तथा केन्द्रीय सदस्य एवं वीरगंज महानगरपालिकाका पूर्वमेयर विजय सरावगीलगायत केही प्रभावशाली नेताहरू अनुपस्थित रहे ।

भेलाले अध्यक्ष ओलीलाई प्रतिशोधपूर्ण, पूर्वाग्रही र गैरकानुनी तरिकाले पक्राउ गरिएको दाबी गर्दै तत्काल रिहा गर्न माग गरेको छ । कार्यक्रममा बोल्ने स्थानीय नेताहरूले वर्तमान सरकारले राजनीतिक प्रतिशोधको नीति अपनाएको आरोप लगाए । उनीहरूले गौरी बहादुर कार्की आयोगको प्रतिवेदन सार्वजनिक नगरी पूर्वप्रधानमन्त्री ओली र नेपाली कांग्रेसका नेता तथा पूर्वगृहमन्त्री रमेश लेखकलाई पक्राउ गरिएकोप्रति असन्तुष्टि जनाए ।

एमाले पर्साका नेता रुपेश पाण्डेले पार्टीलाई नयाँ ढंगले अघि बढाउनुपर्ने आवश्यकता औंल्याउँदै निर्देशन उल्लंघन गर्ने नेतामाथि कडा कारबाही गर्नुपर्ने बताए । उनले आन्दोलनमा सहभागी भई टिकट लिएका र निर्वाचित जनप्रतिनिधिहरूको अनिवार्य उपस्थिति सुनिश्चित गर्नुपर्ने माग पनि राखे ।

डा. विशम्भर कुमार शर्माको अध्यक्षतामा सम्पन्न भेलामा केन्द्रीय सदस्य प्रभु हजरा, निर्मला देवकोटा, प्रदेश उपाध्यक्ष बिचारी प्रसाद यादव, नेता जालिम मियाँ, नेतृ रिमा कुमारी यादव, प्रदेशसभा सदस्य तथा पूर्वमन्त्री प्रमोद जयसवाल, जन्नत अन्सारी, जिल्ला सचिव महेश दास, मानदेव हजरा, सन्जु छतकुलीलगायतले मन्तव्य व्यक्त गरेका थिए ।