वीरगंज (पर्सा), २४ चैत । वीरगंजको लिंकरोडमा स्थापना गरिएको नमस्ते एजुकेसन फाउन्डेसन प्रा.लि. मंगलबारदेखि औपचारिक रूपमा सञ्चालनमा आएको छ । एक औपचारिक कार्यक्रमबीच संस्थाका अध्यक्ष अजित चौरसिया र एक छात्राले संयुक्त रूपमा रिबन काट्दै फाउन्डेसनको उद्घाटन गरेका हुन् । उद्घाटनसँगै यस संस्थाले विशेषगरी भारतमा उच्च शिक्षा हासिल गर्न इच्छुक नेपाली विद्यार्थीहरूलाई लक्षित गरी शैक्षिक परामर्श सेवा प्रदान गर्ने कार्य सुरु गरेको छ ।
नेपालबाट प्रत्येक वर्ष ठूलो संख्यामा विद्यार्थी उच्च शिक्षाका लागि भारत जाने गरेका छन् । भौगोलिक नजिकियत, सांस्कृतिक समानता र तुलनात्मक रूपमा सहज भर्ना प्रक्रिया जस्ता कारणले भारत नेपाली विद्यार्थीका लागि आकर्षक गन्तव्य बन्ने गरेको छ । तर, पर्याप्त जानकारी र सही मार्गदर्शनको अभावमा धेरै विद्यार्थीले विषय छनोट, उपयुक्त कलेज चयन तथा भर्ना प्रक्रियामा चुनौती सामना गर्नुपर्ने अवस्था देखिन्छ । यही वास्तविकतालाई ध्यानमा राख्दै नमस्ते एजुकेसन फाउन्डेसन स्थापना गरिएको अध्यक्ष चौरसियाले बताएका छन् ।
उनका अनुसार, उच्च शिक्षाको सफल यात्राका लागि प्रारम्भिक निर्णयहरू अत्यन्त महत्वपूर्ण हुन्छन् । गलत विषय छनोट वा कमजोर शैक्षिक संस्थामा भर्ना हुँदा विद्यार्थीको भविष्यमा प्रत्यक्ष असर पर्न सक्छ । त्यसैले फाउन्डेसनले विद्यार्थीको रुचि, क्षमता र करियर लक्ष्यलाई विश्लेषण गर्दै उपयुक्त विषय र कलेज छनोटमा सहयोग गर्ने लक्ष्य लिएको छ । यसका लागि निःशुल्क काउन्सेलिङ सेवा उपलब्ध गराइनेछ, जसले विद्यार्थीलाई सूचित र विवेकपूर्ण निर्णय लिन मद्दत गर्ने अपेक्षा गरिएको छ ।
फाउन्डेसनले भर्ना प्रक्रियालाई मात्र सहज बनाउने नभई आवश्यक कागजात तयारी, आवेदन प्रक्रिया तथा कलेजसँग समन्वय गर्ने कार्यमा पनि सहजीकरण गर्ने जनाएको छ । यसका साथै, भारतमा अध्ययनका क्रममा आवश्यक पर्ने जानकारी जस्तै बसोबास, वातावरण अनुकूलन, शैक्षिक प्रणालीको बुझाइ सम्बन्धी परामर्श पनि उपलब्ध गराइनेछ । यसले विद्यार्थीलाई नयाँ शैक्षिक परिवेशमा छिटो घुलमिल हुन सहयोग पुर्याउने विश्वास लिइएको छ ।
यस्ता परामर्श केन्द्रहरूको भूमिका आजको प्रतिस्पर्धात्मक शैक्षिक परिवेशमा झन् महत्वपूर्ण बन्दै गएको छ । सूचना प्रविधिको विस्तार भएपनि विश्वसनीय र अद्यावधिक जानकारी छनोट गर्न नसक्दा विद्यार्थीहरू अझै अन्योलमा पर्ने गरेका छन् । यस्तो अवस्थामा पेशेवर परामर्शले मात्र सही दिशानिर्देशन दिन सक्छ । विशेषगरी मध्यमवर्गीय तथा ग्रामीण पृष्ठभूमिका विद्यार्थीका लागि यस्ता सेवाले अवसरको ढोका खोल्ने काम गर्छ ।
स्थानीय स्तरमै गुणस्तरीय शैक्षिक परामर्श सेवा उपलब्ध हुँदा विद्यार्थी र अभिभावकलाई आर्थिक तथा मानसिक दुवै रूपमा सहजता हुने अपेक्षा गरिएको छ । बाहिरका ठूला शहरमा जानुपर्ने बाध्यता कम हुनुका साथै समय र खर्च दुवै बचत हुने देखिन्छ । फाउन्डेसनले भविष्यमा भारतबाहेक अन्य देशहरूमा अध्ययन गर्न चाहने विद्यार्थीका लागि पनि सेवा विस्तार गर्ने योजना अघि सारेको छ । यसले नेपाली विद्यार्थीलाई विश्वस्तरको शिक्षा प्राप्त गर्ने अवसरमा थप पहुँच विस्तार गर्ने संकेत दिएको छ । उद्घाटन कार्यक्रममा विभिन्न संघ–संस्थाका प्रतिनिधि, सञ्चारकर्मी, विद्यार्थी तथा अभिभावकहरूको उल्लेखनीय सहभागिता रहेको थियो । 
प्रतिक्रिया दिनुहोस् !