वीरगंज (पर्सा), २३ चैत । संघीय मन्त्री परिषदको निर्णयनुसार सोमबारदेखि मुलुकभरका सेवा प्रदायक सवै सरकारी कार्यालयहरू बिहान ९ बजेदेखि खुलेका छन् । आइतबार बसेको मन्त्रिपरिषद बैठकले कार्यालयहरू विहान ९ बजे खुलेर साँझ ५ बजे बन्द हुने निर्णय गरेको थियो ।
सो बमोजिम पर्सा जिल्लाका सरकारी कार्यालयहरूमा सोमबार विहान ९ बजे अघि नै सेवाग्राहीहरू पुगिसकेका थिए । जिल्ला प्रशासन कार्यालय पर्सामा कार्यालय खुल्नु अघि नै सेवाग्राहीहरू पुगि सकेको र कर्मचारीहरू पनि साँढे आठ देखि पौने नौ बजेको विचमा फाँटमा उपस्थित भइसकेको नागरिककता फाँटमा कार्यरत कर्मचारी मृतुञ्जय मिश्रले बताए ।
यसैगरि जिल्ला मालपोत, नापी कार्यालय लगायतका कार्यालयहरूमा पनि विहान कार्यालय खुल्नु अघि नै सेवाग्राही पुगी सकेको भएतापनि लेखापढी व्यावासायीहरूको आन्दोलनको कारण सेवा लिन नसकेको बताएका छन् । सरकारले निर्णय गरेको कुरा आफुहरूलाई सामाजिक सञ्जाल मार्फत आइतवार नै जानकारी भएको कार्यालयमा पुगेका सेवाग्राहीहरूले बताएका छन् ।
यसअघि कार्यालय समय बिहान १० बजेदेखि साँझ ५ बजेसम्म थियो । जाडोयाम (कात्तिक १६ गतेदेखि माघ १५ गतेसम्म) भने कार्यालय समय बिहान १० बजेदेखि दिउँसो ४ बजेसम्म सन्चालन हुन्थ्यो । मन्त्रिपरिषद् बैठकले इन्धन खपत घटाउनका लागि शनिबार र आइतबार दुई दिन बिदा दिने तथा सरकारी कार्यालय बिहान ९ बजेदेखि बेलुकी ५ बजेसम्म सञ्चालन गर्ने निर्णय गरेको थियो ।
यसैविच बैंकिङ क्षेत्रमा पनि सातामा दुई दिन बिदा लागू हुने भएको छ । बैंक तथा वित्तीय संस्थाहरू पनि अब सोमबारदेखि शुक्रबारसम्म सातामा ५ दिन खुल्ने भएका छन् । सरकारले तोकेको समय अनुसार काम गर्ने समय एक घण्टा समय थप गरिएकोमा सोमबारदेखि बैंक तथा वित्तीय संस्थाहरू बिहान ९ बजेदेखि बेलुका ४ बजेसम्म खुल्ने भएका छन् ।
यसअघि बैंक तथा वित्तीय संस्था बिहान १० बजेदेखि बेलुका ३ बजेसम्म खुल्ला रहन्थे । नेपाल राष्ट्र बैंकले २२ चैतबाटै सातामा सोमबार–शुक्रबारसम्म बिहान ९ बजेदेखि बेलुका ४ बजेसम्म बैंक खुला गरी बैंकिङ सेवा प्रवाह गर्न भनेको छ । सोही व्यवस्था अनुसार सोमबारदेखि बैंक तथा वित्तीय संस्थाहरूले बिहान ९ बजेदेखि सेवा प्रवाह गर्न थालेका हुन् ।
प्रतिक्रिया दिनुहोस् !