वीरगंज (पर्सा), २२ चैत । वीरगंजस्थित नेशनल मेडिकल कलेज तथा शिक्षण अस्पतालमा स्पोट्र्स वीक २०८२ को उद्घाटन समारोह सम्पन्न भएको छ । कलेज परिसरको फुटबल मैदानमा बिहान ९ः३० बजेदेखि सुरु भएको कार्यक्रममा विद्यार्थी, शिक्षक र कर्मचारीहरूको उल्लेखनीय सहभागिता देखिएको थियो ।
कार्यक्रम कलेजका प्रिन्सिपल प्रा.डा. के.एन. सिंहको अध्यक्षतामा सम्पन्न भएको हो भने प्रबन्ध निर्देशक शहनवाज अन्सारी प्रमुख अतिथिका रूपमा सहभागी रहेका थिए । त्यसैगरी एडमिशन तथा मार्केटिङ निर्देशक अबिद हुसैन अन्सारी, अस्पताल निर्देशक डा. इश्रत जहाँ अन्सारी, उप–प्राचार्य डा. रवि शंकर गुप्ता, डेन्टल उप–प्राचार्य प्रा. डा. सरोज देव, नर्सिङ निर्देशक प्रा. गंगा गुरुङ तथा नर्सिङ क्याम्पसकी उप–प्राचार्य प्रा. बबिता सिंहलगायत विशिष्ट व्यक्तित्वहरूको उपस्थिति रहेको थियो ।
स्पोट्र्स चेयरपर्सन प्रा. डा. आनन्द कुमार चौरेसिया, सदस्य सचिव जाफ्रे आलम अन्सारी र को–अर्डिनेटर मोहम्मद फिरोजले कार्यक्रम व्यवस्थापनमा सक्रिय भूमिका निर्वाह गरेका थिए । साथै मधेश प्रदेशका राष्ट्रिय क्रिकेट टोलीका कप्तान हाशिम अन्सारीको विशेष उपस्थितिले कार्यक्रमको गरिमा अझ बढाएको थियो ।
कार्यक्रममा अध्यक्ष, प्रमुख तथा विशेष अतिथिहरूले मन्तव्य राख्दै खेलकुदले विद्यार्थीहरूको शारीरिक तन्दुरुस्ती, अनुशासन र नेतृत्व क्षमताको विकासमा महत्वपूर्ण योगदान पुर्याउने धारणा व्यक्त गरेका थिए । कार्यक्रमका क्रममा विभिन्न संकायका विद्यार्थीहरूले आकर्षक मार्चपास्ट प्रस्तुत गरेका थिए । स्वयंसेवकहरूलाई खेल सामग्री वितरण गरिएको थियो । उद्घाटनको मुख्य आकर्षणका रूपमा विद्यार्थी र शिक्षकबीच मैत्रीपूर्ण फुटबल खेल सम्पन्न भएको थियो ।
कार्यक्रममा आईटी, मार्केटिङ, प्रशासन तथा सञ्चार क्षेत्रका प्रतिनिधिहरूको पनि उल्लेखनीय सहभागिता देखिएको थियो । स्पोट्र्स वीक २०८२ अन्तर्गत आगामी दिनहरूमा विभिन्न खेलकुद प्रतियोगिताहरू आयोजना गरिने कलेजका प्रेस सल्लाहकार आशिक अन्सारीले जानकारी दिएका छन् । 
प्रतिक्रिया दिनुहोस् !