वीरगंज (पर्सा), २२ चैत । प्रधानमन्त्री कप पुरुष राष्ट्रिय क्रिकेट प्रतियोगितामा लुम्बिनी प्रदेशले आइतबार वीरगंजको नारायणी क्रिकेट मैदानमा विभागीय टोली नेपाल पुलिस क्लबमाथि ५० रनले जीत हासिल गरेको छ । २५७ रनको लक्ष्य पछ्याएको पुलिस क्लबलाई लुम्बिनीले २०६ रनमै समेट्दै महत्वपूर्ण जीत हात पारेको हो ।
पुलिसका लागि ओपनर दिनेश खरेल १०४ बलमा ९४ रन बनाए पनि हार टार्न सकेनन् । उनले १० चौका र ६ छक्का प्रहार गरे । दिनेशलाई ३२औँ ओभरमा लुम्बिनीका देव खनालले आउट गरेका थिए । पुलिसका अन्य ब्याटरमध्ये सरवन यादवले ३६, दिलसाद अलिले २२, करण केसीले १४ र शंकर रानाले १२ रन मात्र जोड्न सके ।
लुम्बिनीका बलर अजय चौहानले ९.५ ओभर बलिङ गर्दै ३७ रन खर्चेर चार विकेट लिए । उनले कप्तान आरिफ शेख, अभिनाश कर्ण, करण केसी र सरवन यादवलाई पभेलियन फर्काए । त्यस्तै, कप्तान देव खनालले तीन विकेट लिए भने बिर मगर, निर्मल गुरुङ र सन्तोष यादवले समान एक/एक विकेट लिए ।
यसअघि पुलिसले टस जितेर ब्याटिङ दिने निर्णय गरेको थियो । लुम्बिनीका ओपनर रञ्जित खड्काको १२८ बलमा १२८ रनको शतकीय इनिङले टोलीलाई २५६ रनको बलियो योगफल दिलायो । उनले १३ चौका र ३ छक्का प्रहार गरे । आकाश त्रिपाठीले ३६ र दर्श सोनारले ३३ रन जोड्दै राम्रै सहयोग गरे ।
पुलिसतर्फ ललित राजवंशीले तीन विकेट लिए भने रासिद खान र दिनेश खरेलले समान दुई/दुई विकेट हात पारे । करण केसी, आरिफ शेख र दिपक सेरालाले एक/एक विकेट लिए । यस जितसँगै लुम्बिनी सात अंकसहित तालिकाको चौथो स्थानमा उक्लिएको छ, जबकि पुलिस समान सात अंकसहित तेस्रो स्थानमै छ । 
प्रतिक्रिया दिनुहोस् !