गौर (रौतहट), २२ चैत । जेनजी आन्दोलनपछिको राजनीतिक परिवर्तनसँगै गठन भएको नयाँ सरकारप्रति आम नागरिकको अपेक्षा उल्लेखनीय रूपमा बढेको छ । विशेषगरी बालेन्द्र शाह नेतृत्वको सरकार बनेपछि वर्षौंदेखि थलिएको औद्योगिक क्षेत्र पुनर्जीवित हुने आशा विभिन्न जिल्लामा देखिन थालेको छ ।
यसैक्रममा रौतहटको गरुडा नगरपालिका–५ महम्मदपुरस्थित लामो समयदेखि बन्द रहेको श्रीराम सुगर मिल्स पुनः सञ्चालन हुने सम्भावनाले स्थानीयवासी, किसान तथा सरोकारवालाहरूमा नयाँ आशा जगाएको छ । यद्यपि, सरकारको १०० बुँदे शासकीय सुधार कार्यसूचीमा यो मिल समावेश नभए पनि स्थानीय स्तरमा सक्रियताले उद्योग पुनर्जीवित हुन सक्ने विश्वास व्यक्त गरिएको छ ।
२०४९ सालमा उद्योगपति दिवाकर गोल्छा द्वारा स्थापना गरिएको उक्त उद्योग एक समय मधेसकै प्रमुख औद्योगिक केन्द्रका रूपमा परिचित थियो । अत्याधुनिक प्रविधिसहित सञ्चालनमा रहेको यस मिलले दैनिक ठूलो परिमाणमा उखु प्रशोधन गर्ने क्षमता राख्थ्यो । त्यसबेला रौतहट, बारा र सर्लाहीका हजारौं किसानले आफ्नो उत्पादन बिक्रीका लागि भरपर्दो बजार पाएका थिए ।
उद्योग सञ्चालनमा हुँदा प्रत्यक्ष रूपमा एक हजारभन्दा बढीले रोजगारी पाएका थिए भने अप्रत्यक्ष रूपमा ढुवानी, व्यापार, कृषि तथा सेवा क्षेत्रमा हजारौंको जीविकोपार्जन यसैसँग जोडिएको थियो । तर व्यवस्थापन कमजोरी, आर्थिक संकटलगायत कारण देखाउँदै २०७७ साउन ११ गते उद्योग बन्द भएपछि किसानहरू वैकल्पिक बजार खोज्न बाध्य भएका थिए । कतिपयले त उखु खेती नै छाड्नुपरेको अवस्था छ ।
स्थानीयका अनुसार उचित व्यवस्थापन र स्पष्ट नीति अपनाइए उद्योग पुनः सञ्चालन गर्न सम्भव छ । उद्योग पुनः सञ्चालन भएमा एक हजारभन्दा बढीले प्रत्यक्ष रोजगारी पाउने र हजारौं किसान लाभान्वित हुने अपेक्षा गरिएको छ । साथै, स्वदेशमै चिनी उत्पादन बढेर आयातमा निर्भरता घट्ने विश्वास पनि गरिएको छ ।
स्थानीय व्यवसायीहरूका अनुसार मिल सञ्चालनमा आए क्षेत्रको समग्र अर्थतन्त्र चलायमान हुनेछ । कृषि, व्यापार र रोजगारीमा सकारात्मक प्रभाव पर्नेछ । एक समय देशकै गौरवका रूपमा चिनिएको उद्योगको पुनः सञ्चालनलाई स्थानीयहरूले औद्योगिक पुनरुत्थान मात्र नभई आर्थिक पुनर्जागरणसँग जोडेर हेरेका छन् ।
हालसम्म सरकारबाट स्पष्ट निर्णय सार्वजनिक नभए पनि बालेन्द्र शाह नेतृत्वको सरकारले सुशासन र विकासलाई प्राथमिकता दिएको भन्दै स्थानीयवासी आशावादी देखिएका छन् । अब सबैको ध्यान सरकारको ठोस पहलतर्फ केन्द्रित छ । 
प्रतिक्रिया दिनुहोस् !