वीरगंज (पर्सा), २२ चैत । पर्सा जिल्लामा पछिल्ला केही वर्षयता देखिएको खानेपानी अभाव समाधानका लागि पर्सागढी नगरपालिकाले दीर्घकालीन पहल सुरु गरेको छ । वन–जंगलको तीव्र दोहन, चुरे क्षेत्रको विनाश तथा पानी पुनर्भरणमा आएको गिरावटका कारण मध्य तराईका भूभागहरू सुक्खा बन्दै जाँदा यहाँका बासिन्दा पानी संकटबाट प्रभावित भइरहेका छन् । यही चुनौतीलाई मध्यनजर गर्दै पर्सागढी नगरपालिकाले पर्सा राष्ट्रिय निकुञ्ज नजिकैको कोइलाभार जंगल क्षेत्रमा रहेको सानो प्राकृतिक मुहानलाई संरक्षण गर्दै पक्का ड्याम निर्माण गरेको हो ।
जंगल क्षेत्रबाट रसाएर आउने पानीलाई संकलन गरी दीर्घकालीन उपयोगमा ल्याउने उद्देश्यले निर्माण गरिएको उक्त संरचनाले जलस्रोत व्यवस्थापनमा नयाँ सम्भावना देखाएको छ । करिब ३३ लाख रुपैयाँको लागतमा तयार गरिएको ड्याम निर्माणमा प्रदेश सरकारको ३० लाख विशेष अनुदान र उपभोक्ता समितिको ३ लाख रुपैयाँ लगानी रहेको छ । वडा नम्बर १ स्थित कोइलाभार वन क्षेत्रमा बनाइएको यो संरचनाले दुई स्थानीय तहका चार वडासम्म सिँचाइ सुविधा विस्तार गर्ने लक्ष्य राखेको छ ।
नगरप्रमुख गोकर्ण पाठकका अनुसार पछिल्ला वर्षहरूमा पर्सामा खानेपानीको समस्या बढ्दै गएपछि स्रोत पहिचान र संरक्षणमा नगरपालिका केन्द्रित भएको हो । उनका अनुसार पानी संकलन र पुनर्भरणलाई जोड दिने यस्तो ड्याम निर्माणले दीर्घकालीन रूपमा भूमिगत जलस्तर सुधार गर्न मद्दत पुग्ने विश्वास गरिएको छ । प्रमुख प्रशासकीय अधिकृत राजु साहले पनि ड्यामले बहुआयामिक फाइदा दिने बताए । उनका अनुसार यसले सिँचाइमा सहयोग पुर्याउनुका साथै जलचर तथा वन्यजन्तुको पानी आवश्यकतामा समेत सहजता ल्याउनेछ । साथै वन क्षेत्रको हरियाली संरक्षण र जलवायु परिवर्तनको प्रभाव न्यूनीकरणमा समेत यो पहल सहायक बन्ने अपेक्षा गरिएको छ ।
विशेषगरी सुख्खा मौसममा देखिने पानी अभावलाई ध्यानमा राख्दै यस्तो संरचना निर्माण गरिएको हो । विज्ञहरूले पनि चुरे क्षेत्रको चिस्यानयुक्त भूभागमा यस्ता ड्याम निर्माण गर्दा पानी पुनर्भरणमा सकारात्मक प्रभाव पर्ने सुझाव दिएका थिए । त्यसैका आधारमा पालिकाले यो योजना कार्यान्वयनमा ल्याएको हो । हाल निर्माण गरिएको ड्यामबाट पर्सागढी नगरपालिका वडा नम्बर १, ७ र ९ तथा सखुवाप्रसौनी गाउँपालिकाको वडा नम्बर १ अन्तर्गत करिब ७ सय बिगाहा जमिनमा सिँचाइ सुविधा पुग्ने अनुमान गरिएको छ । साथै जंगल क्षेत्रमै पानी उपलब्ध भएपछि वन्यजन्तु र पशुपन्छीलाई समेत सहज हुने बताइएको छ ।
यस सफल पहलपछि नगरपालिकाले अन्य सम्भावित स्रोतहरूको पनि पहिचान गरिसकेको जनाएको छ । आगामी दिनमा यस्ता थप ड्याम निर्माण गरी पानी पुनर्भरण र व्यवस्थापनलाई अझ सुदृढ बनाउने योजना अघि सारिएको छ । यसैबीच, ड्याम आसपासको क्षेत्रलाई पर्यटकीय स्थलका रूपमा विकास गर्ने तयारी पनि थालिएको छ । खुला चौरलाई पिकनिक स्थलका रूपमा विकास गर्ने, पौडी पोखरी निर्माण गर्ने तथा आन्तरिक पर्यटकलाई लक्षित गरी आवश्यक पूर्वाधार थप गर्ने योजना नगरपालिकाले बनाएको छ । साथै पानीको उपयोगलाई सहज बनाउन धारा जडान गर्ने तयारीसमेत गरिएको छ ।
यसरी पर्सागढी नगरपालिकाले पानी संकट समाधानसँगै वातावरण संरक्षण र पर्यटन प्रवद्र्धनलाई जोड्ने प्रयास थालेको छ, जसले स्थानीयस्तरमै दीर्घकालीन विकासको नयाँ उदाहरण प्रस्तुत गर्ने अपेक्षा गरिएको छ । 
प्रतिक्रिया दिनुहोस् !