वीरगंज (पर्सा), २१ चैत । बालेन्द्र शाह समक्ष मधेश प्रदेशमा शिक्षा क्षेत्र सुधारका लागि आम जनता पार्टीका प्रदेश अध्यक्ष उमेश कुशवाहा ले चार बुँदे महत्वपूर्ण सुझाव प्रस्तुत गरेका छन् । कुशवाहाले मधेशमा उच्च शिक्षाको पहुँच अझ विस्तार गर्न आवश्यक रहेको उल्लेख गर्दै बारा, रौतहट, महोत्तरी र सर्लाही जिल्लामा कम्तीमा एकएक वटा आङ्गिक कलेज स्थापना गर्नुपर्ने प्रस्ताव अघि सारेका छन् ।
उनका अनुसार यस्ता संस्थाले स्थानीय विद्यार्थीलाई घर नजिकै उच्च शिक्षा हासिल गर्ने अवसर प्रदान गर्नेछन् । त्यसैगरी, स्वास्थ्य र प्राविधिक शिक्षाको विकासलाई प्राथमिकतामा राख्दै मेडिकल कलेज तथा अन्य प्राविधिक शिक्षण संस्थाहरूको स्थापना र सञ्चालनमा राज्यले विशेष ध्यान दिनुपर्ने उनले सुझाएका छन् ।
कुशवाहाले विद्यालय तहमा देखिएको शिक्षक अभावको समस्या समाधानतर्फ पनि ध्यानाकर्षण गराएका छन् । विद्यार्थी संख्याको आधारमा शिक्षक दरबन्दी मिलान गर्नुका साथै माध्यमिक तहमा विषयगत तथा तहगत शिक्षकको व्यवस्था गर्नुपर्ने आवश्यकता उनले औंल्याएका छन् ।
मधेश प्रदेशको शैक्षिक गुणस्तर सुधार गर्दै सबै वर्गका विद्यार्थीलाई समान अवसर सुनिश्चित गर्न यी प्रस्तावहरू शीघ्र कार्यान्वयनमा लैजानुपर्नेमा उनले जोड दिएका छन् । 
प्रतिक्रिया दिनुहोस् !