वीरगंज (पर्सा), १९ चैत । पर्सा जिल्ला अदालतले ठगी तथा संगठित अपराधसम्बन्धी मुद्दामा मुछिएका रवि लामिछानेलाई वारेश (प्रतिनिधि) राख्न अनुमति प्रदान गरेको छ । न्यायाधीश सुमन कुमार न्यौपानेको इजलासले दिएको आदेशअनुसार लामिछानेले आफ्नो नियन्त्रणभन्दा बाहिरको परिस्थितिका कारण तोकिएको तारेखमा स्वयं उपस्थित हुन नसक्ने जनाउँदै वारेश नियुक्तिको माग गरेका थिए ।
अदालतले सो निवेदनमाथि सुनुवाइ गर्दै आवश्यक कानुनी आधार र पेश गरिएका कागजातहरूको अध्ययन गरेको जनाएको छ । प्रतिवादीको पक्षबाट अधिवक्ता चन्द्रिका प्रसाद पटेलले बहस प्रस्तुत गर्दै लामिछानेको स्वास्थ्य अवस्था र विभिन्न अदालतहरूमा एकै समयमा मुद्दा चलिरहेकाले तारेख जुध्न सक्ने अवस्था रहेको तर्क राखेका थिए ।
अदालतले मुलुकी फौजदारी कार्यविधि संहिता २०७४ को दफा ८९ र ९५ अनुसार विशेष परिस्थितिमा वारेश राख्न सकिने व्यवस्था रहेको उल्लेख गर्दै स्वास्थ्य अवस्था र बहुविध अदालतमा मुद्दा चलिरहेको अवस्थालाई आधार मानेको स्पष्ट पारेको छ । यसै आधारमा आवश्यक पर्दा वारेशमार्फत अदालतमा उपस्थित गराउने गरी अनुमति दिइएको अदालतले जनाएको छ । साथै, आदेश कार्यान्वयनका लागि सम्बन्धित निकायलाई नियमानुसार प्रक्रिया अघि बढाउन निर्देशन दिइएको छ । 
प्रतिक्रिया दिनुहोस् !