वीरगंज (पर्सा), १८ चैत । चालू आर्थिक वर्षको साउनदेखि फागुनसम्मको ७ महिनामा वीरगंज नाका हुँदै नेपालमा नयाँ सवारीसाधन आयातमा उल्लेखनीय उछाल देखिएको छ । यस अवधिमा कुल १९ अर्ब ८४ करोड रुपैयाँ बराबरका सवारीसाधन भित्रिँदा वीरगंज भन्सार कार्यालयले मात्रै १५ अर्ब ४० करोड रुपैयाँ राजस्व संकलन गरेको छ ।
गत आर्थिक वर्षको सोही अवधिसँग तुलना गर्दा यो वृद्धि झनै चकित पार्ने खालको छ । अघिल्लो वर्ष ७ महिनामा १३ अर्ब ९५ करोड रुपैयाँ बराबरका सवारीसाधन आयात हुँदा १२ अर्ब १२ करोड राजस्व उठेको थियो । यसरी हेर्दा चालू वर्षमा ५ अर्ब ६९ करोड रुपैयाँ बढी मूल्यका सवारीसाधन आयात भएका छन् भने राजस्वमा समेत ३ अर्ब २८ करोड रुपैयाँको उल्लेखनीय वृद्धि भएको वीरगन्ज भन्सार कार्यालयका सूचना अधिकारी उदयसिंह विष्टले जानकारी दिएका छन् ।
विशेषगरी विद्युतीय सवारीसाधनको आयातमा तीव्र वृद्धि देखिएको छ । चालू आर्थिक वर्षको ७ महिनामा १ अर्ब ४८ करोड ६४ लाख रुपैयाँ मूल्यका ४ सय ९७ वटा विद्युतीय जिप, कार र भ्यान आयात भएका छन्, जसबाट ९६ करोड ३६ लाख रुपैयाँ राजस्व संकलन भएको छ । अघिल्लो वर्ष सोही अवधिमा ४३ करोड १० लाख रुपैयाँ मूल्यका १ सय ६५ वटा मात्रै यस्ता सवारी आयात भएका थिए । यसरी विद्युतीय चारपांग्रे सवारीको आयात २१७ प्रतिशतले बढेको देखिन्छ ।
त्यस्तै, विद्युतीय मोटरसाइकलतर्फ पनि आकर्षण उल्लेखनीय रूपमा बढेको छ । चालू वर्षमा ८० करोड ५७ लाख रुपैयाँ मूल्यका ६ हजार १२८ वटा विद्युतीय मोटरसाइकल भित्रिँदा २६ करोड ४३ लाख रुपैयाँ राजस्व उठेको छ । अघिल्लो वर्ष ४४ करोड ३० लाख रुपैयाँ मूल्यका ३ हजार ३७४ वटा मोटरसाइकल आयात भएका थिए। यस आधारमा विद्युतीय मोटरसाइकल आयात ८७ प्रतिशतले वृद्धि भएको छ ।
यता, इन्धन (डिजेल तथा पेट्रोल)बाट चल्ने सवारीसाधनको आयातमा भने घट्दो प्रवृत्ति देखिएको छ । चालू वर्षको ७ महिनामा १ अर्ब १६ करोड १३ लाख रुपैयाँ मूल्यका ६ सय ९ वटा जिप, कार र भ्यान आयात हुँदा २ अर्ब ८६ करोड रुपैयाँ राजस्व उठेको छ । अघिल्लो वर्ष सोही अवधिमा १ अर्ब ५० करोड रुपैयाँ मूल्यका ७ सय ४८ वटा सवारी आयात भएका थिए, जसबाट ३ अर्ब ७३ करोड राजस्व संकलन भएको थियो ।
यद्यपि पेट्रोलबाट चल्ने मोटरसाइकलको आयात भने बढेको देखिन्छ । चालू वर्षमा ५५ करोड रुपैयाँ मूल्यका ५ हजार ३४७ वटा मोटरसाइकल भित्रिँदा ६९ करोड ५३ लाख रुपैयाँ राजस्व संकलन भएको छ । अघिल्लो वर्ष सोही अवधिमा २७ करोड २० लाख रुपैयाँ मूल्यका २ हजार ८१८ वटा मोटरसाइकल आयात हुँदा ३४ करोड २० लाख रुपैयाँ राजस्व उठेको थियो । समग्रमा वीरगंज नाका हुँदै सवारीसाधन आयातमा व्यापक विस्तारसँगै राजस्व संकलनमा समेत उल्लेखनीय उछाल आएको छ । विशेषगरी विद्युतीय सवारीसाधनप्रति बढ्दो आकर्षणले नेपालको यातायात बजारमा परिवर्तनको संकेत स्पष्ट देखिएको छ । 
प्रतिक्रिया दिनुहोस् !