वीरगंज (पर्सा), १८ चैत । करिब दुई करोड ९३ लाख रुपैयाँ बराबरको राजश्व हिनामिना प्रकरणमा अख्तियार दुरुपयोग अनुसन्धान आयोगले पर्साका तत्कालीन मालपोत अधिकृतसहित पाँच जनाविरुद्ध विशेष अदालतमा भ्रष्टाचार मुद्दा दायर गरेको छ ।
आर्थिक वर्ष २०७०/७१ मा ठूलो मात्रामा राजश्व अनियमितता गरिएको निष्कर्षसहित आयोगले तत्कालीन मालपोत अधिकृत हरिनारायण मिश्र, भूपबहादुर बोगटी, पदम अर्याल, सुरेन्द्र प्रसाद कुर्मी तथा नायब सुब्बा स्वर्गीय किरण उपाध्यायको हकमा उनका अंशीयार छोरा राजकिशोर उपाध्याय र गौतम उपाध्यायलाई प्रतिवादी बनाएर बुधबार मुद्दा अघि बढाएको हो ।
अनुसन्धानका क्रममा रजिस्ट्रेशन शाखा ‘ग’ मा गम्भीर अनियमितता भएको खुलासा भएको छ । एउटै रजिस्ट्रेशन नम्बर दोहोर्याएर तथा तेहेर्याएर प्रयोग गर्दै एकभन्दा बढी लिखत पारित गरिएको पाइएको छ । दर्ता किताबमा एउटै नम्बरका लिखतहरू प्रविष्ट गरिए पनि राजश्व रसिदसँग तुलना गर्दा कम रकम देखाइएका कागजात मात्र प्रस्तुत गरिएको र बढी राजश्व लाग्ने लिखतहरू योजनाबद्ध रूपमा लुकाइएको भेटिएको आयोगको अभियोगपत्रमा उल्लेख छ ।
त्यस्तै, केही लिखतबाट उठेको राजश्व बैंकमा दाखिला गरिएको देखिए पनि उच्च राजश्व आउने अन्य महत्वपूर्ण लिखतहरू दर्ता किताबमै समावेश नगरी रकम हिनामिना गरिएको तथ्यसमेत बाहिर आएको छ। आन्तरिक तथा अन्तिम लेखापरीक्षणसमेत नगरी यस्तो अनियमितता गरिएको अनुसन्धानबाट पुष्टि भएको छ ।
अख्तियारका अनुसार सो आर्थिक वर्षमा कुल २ करोड ९३ लाख ६८ हजार ५६५ रुपैयाँ बराबरको राजश्व हिनामिना भएको ठहर गरिएको छ । उक्त प्रकरणमा संलग्न सबैलाई कानुनबमोजिम कडा कारबाहीको मागसहित मुद्दा दायर गरिएको आयोगले जनाएको छ । 
प्रतिक्रिया दिनुहोस् !