वीरगंज (पर्सा), १७ चैत । सशस्त्र प्रहरी बल नेपाल नं. १३ गण मुख्यालय, पर्साद्वारा सञ्चालित ‘विपद् स्वयंसेवक परिचालन विस्तारित तालिम’ औपचारिक रूपमा सम्पन्न भएको छ । वीरगंज महानगरपालिका–१४ स्थित गण मुख्यालयमा सोमबार आयोजित समापन समारोह प्रमुख जिल्ला अधिकारी भोला दाहालको प्रमुख आतिथ्यतामा सम्पन्न भएको हो ।
फागुन २५ गतेदेखि सुरु भई चैत १६ गतेसम्म सञ्चालन गरिएको उक्त तालिमले स्थानीय स्तरमा विपद् व्यवस्थापन क्षमतामा उल्लेखनीय सुदृढता ल्याउने अपेक्षा गरिएको छ । समापन कार्यक्रममा सशस्त्र प्रहरी उपरीक्षक तथा गणपति मोहनबहादुर क्षेत्री, राष्ट्रिय अनुसन्धान जिल्ला कार्यालय पर्साका उप–अनुसन्धान निर्देशक सन्तोष ढुङ्गेल, नेपाली सेनाको श्री जंग गणका गणपति प्रमुख सेनानी लोकेन्द्र कार्की, जिल्ला प्रहरी कार्यालय पर्साका प्रहरी नायब उपरीक्षक राजु कार्की लगायत सुरक्षा निकायका उच्च अधिकारीहरूको उपस्थिति रहेको थियो ।
यसका साथै वडा नं. १४ का अध्यक्ष महबुब एलाही अन्सारी, सञ्चारकर्मी, स्पर्श मल्टीस्पेशलिटी हस्पिटल प्रा.लि. का अध्यक्ष डा. महेश्वर प्रसाद कुर्मी, स्वास्थ्यकर्मी, स्थानीय अगुवा, प्रशिक्षक तथा सशस्त्र प्रहरीका विभिन्न दर्जाका कर्मचारी गरी करिब ८० देखि ९० जनाको सहभागिता रहेको थियो । तालिम सफलतापूर्वक पूरा गरेका २९ जना विपद् स्वयंसेवकहरूलाई प्रमुख जिल्ला अधिकारी दाहालले प्रमाणपत्र प्रदान गरेका थिए ।
कार्यक्रममा बोल्दै वक्ताहरूले विपद् व्यवस्थापन तथा उद्धार कार्यमा प्रशिक्षित स्वयंसेवकहरूको भूमिका अत्यन्त महत्वपूर्ण हुनेमा जोड दिएका थिए । सशस्त्र प्रहरी बलका सूचना अधिकारी सशस्त्र प्रहरी नायब उपरीक्षक मोहनराज निरौलाले यस तालिमले आपत्कालीन अवस्थामा द्रुत प्रतिक्रिया दिने क्षमतामा थप वृद्धि गर्ने विश्वास व्यक्त गरेका छन् । 
प्रतिक्रिया दिनुहोस् !