वीरगंज (पर्सा), १७ चैत । आदिशक्ति माँ सहोदरा मन्दिरमा चैत्र १३ गतेदेखि सुरु भएको दस दिने धार्मिक मेलाले ठोरी क्षेत्रलाई पर्यटकीय रूपमा निकै चलायमान बनाएको छ । मेलासँगै श्रद्धालु तथा पर्यटकको भीड उल्लेख्य रूपमा बढ्दै जाँदा ठोरी आसपासका गन्तव्यहरूमा चहलपहल तीव्र बनेको छ । पर्सा, बारा, चितवन लगायत नेपालका विभिन्न जिल्लाका साथै भारतका विभिन्न सहरबाट मेला भर्न आउने भक्तजनहरू सहोदरा मन्दिरमा पूजाअर्चना सकेपछि नजिकै रहेको सोफा मन्दिर र प्राकृतिक सौन्दर्यले भरिएको ठोरी क्षेत्रको भ्रमणमा निस्कने क्रम उल्लेखनीय रूपमा बढेको छ । यसले धार्मिक पर्यटनसँगै आन्तरिक तथा सीमापार पर्यटनलाई पनि उकासेको देखिन्छ ।
भारतको बिहार राज्यमा मदिरा निषेध लागू रहेकाले पनि धेरै भारतीय पर्यटकहरू ठोरीतर्फ आकर्षित भइरहेको स्थानीयको भनाइ छ । ठोरी पुग्नेहरू राईधारा, रेड हिल भ्यू प्वाइन्ट, रानीवन इच्छानगर, बुलबुल पार्क, जमुनाघारी, सीता गुफा, सेतो पहाड, सिनही पर्वत, स्टोन पार्क र ठुटेखोलाको पुल जस्ता रमणीय स्थलहरू घुम्ने गरेका छन् । ठोरी गाउँपालिका–२ स्थित मानवीर होटलका सञ्चालक वीरबहादुर तामाङका अनुसार मेला सुरु भएयता पर्यटकको आगमन सामान्य अवस्थाको तुलनामा झण्डै दोब्बर पुगेको छ। उनका अनुसार मेला सुरु भएको केही दिनमै पर्यटकको चाप झनै बढ्दै गएको छ ।
होटल व्यवसायमा समेत यसको प्रत्यक्ष प्रभाव परेको छ, जहाँ पाहुनाहरूले खाना, खाजा तथा मदिरासमेत उपभोग गर्ने गरेका छन् । भारतको बिहारस्थित नरकटियागंजका पर्यटक अमित कुमारले सहोदरा मेला भर्न आउने क्रममा पहिलो पटक ठोरी घुम्ने अवसर पाएको बताए । अर्का भारतीय पर्यटक सुभाष कुमारले गर्मी मौसम भए पनि ठोरीको शीतल, हरियाली र शान्त वातावरणले आफूलाई अत्यन्त प्रभावित पारेको अनुभव सुनाए ।
त्यसैगरी, बाराको करैयामाई गाउँपालिकाबाट आएका साजन चौधरीले पहिलोपटक मेला भर्न आएको बताउँदै सोफा मन्दिर र ठोरीको चर्चित नाम सुनेपछि यहाँसम्म आइपुगेको बताए । उनले यहाँको भ्रमण स्मरणीय रहेको प्रतिक्रिया दिएका छन् । यसैबीच, सहोदरा मन्दिरबाट करिब आठ किलोमिटर उत्तर–पश्चिममा अवस्थित सोफा मन्दिरमा पनि दर्शनार्थीहरूको संख्या उल्लेख्य रूपमा बढ्दै गएको छ । ऐतिहासिक तथा धार्मिक महत्त्व बोकेको यस मन्दिरको स्थापना प्राचीनकालमा राजा हेतु कुँवरको पालामा भएको जनविश्वास छ । मन्दिरभित्र रहेको सुरुङलाई भारत सरकारले बन्द गरेको बताइन्छ ।
मन्दिर नजिकै बग्ने पण्डई खोलासँग महाभारतकालीन कथा जोडिएको छ । जनविश्वास अनुसार पाण्डवहरूले वनवासको समयमा यस क्षेत्रमा बसोबास गर्दै नित्यकर्म गर्ने गरेका कारण खोलाको नाम पण्डई रहन गएको हो। नेपालतर्फको ठुटे खोला भारत प्रवेश गरेपछि यही नामले चिनिने गरिएको छ । वीरगंज–ठोरी हुलाकी सडक निर्माणपछि नेपालबाट सहोदरा मेला भर्न जाने करिब ८० प्रतिशत यात्रु ठोरी नाकामार्फत आवतजावत गर्ने गरेका छन् । साथै, बिहार प्रशासनले चारचक्के सवारीका लागि ठोरी र इनर्वा नाका मात्र सञ्चालनमा राखेकाले पनि ठोरी हुँदै यात्रा गर्नेको संख्या उल्लेखनीय रूपमा बढेको देखिन्छ । 
प्रतिक्रिया दिनुहोस् !