वीरगंज (पर्सा), ५ चैत । राष्ट्रिय स्वतन्त्र पार्टी (रास्वपा) का तर्फबाट पर्सा क्षेत्र नं. २ बाट निर्वाचित प्रतिनिधिसभा सदस्य सुशील कुमार कानु ले घरेलु हिंसामा गम्भीर घाइते भएकी हरिकला देवी सहनी सँग भेटघाट गरेका छन् । बिहीबार परवानीपुर गाउँपालिका स्थित एलएस न्युरो अस्पतालमा उपचाररत सहनीलाई भेट्दै सांसद कानुले उनको स्वास्थ्य अवस्थाबारे जानकारी लिएका हुन् ।
उनले पीडितमाथि क्रूर आक्रमण गर्ने उनका श्रीमान् विश्वनाथ सहनी लाई यथाशीघ्र पक्राउ गरी कडा कानुनी कारबाही गर्न प्रहरी प्रशासनसँग माग गरेका छन् । भेटका क्रममा सांसद कानुले पीडितको उपचारमा कुनै कमी हुन नदिने आश्वासन दिँदै सम्पूर्ण उपचार खर्च आफैंले व्यवस्थापन गर्ने प्रतिबद्धता व्यक्त गरे । ‘मेरो तलबबाट होस् वा अन्य माध्यमबाट, उपचारको सम्पूर्ण जिम्मेवारी म लिन्छु,’ उनले भने ।
घटना हुँदा आफू काठमाडौंमा पार्टीको अभिमुखीकरण कार्यक्रममा रहेको जानकारी दिँदै उनले त्यहीँबाटै पीडितको अवस्थाबारे निरन्तर जानकारी लिएको बताए । ‘जानकारी पाउनेबित्तिकै मैले पार्टीका प्रतिनिधिलाई अस्पताल पठाएर अवस्थाबारे बुझ्न लगाएँ, र फर्किएलगत्तै प्रत्यक्ष भेट्न आएको हुँ,’ उनले स्पष्ट पारे । यसै क्रममा सांसद कानुले सुदीपराज पाठक, पर्सा प्रहरी प्रमुखसँग पनि घटनाबारे जानकारी लिँदै दोषीलाई छिटो नियन्त्रणमा लिन आग्रह गरेको बताए ।
उनले सामान्य पारिवारिक विवादका क्रममा यस्तो अमानवीय घटना हुनु गम्भीर विषय भएको उल्लेख गर्दै दोषीलाई कडा सजाय दिनुपर्नेमा जोड दिए । महिला हिंसा न्यूनीकरणका लागि कानुनी तथा नीतिगत सुधार आवश्यक रहेको उल्लेख गर्दै सांसद कानुले संसद् अधिवेशन सुरु भएपछि यस विषयलाई सदनमा उठाउने प्रतिबद्धता जनाए । साथै, पीडित महिलाको राहत र पुनर्स्थापनाका लागि सरकारसँग पहल गर्ने पनि उनले बताए ।
प्रतिक्रिया दिनुहोस् !